Van Persie duhtu an tam; Leicester an langsar

Fenerbahce chuan an striker Robin van Persie hralh an duh thu an puang a, RVP-a lei theih tih hriat a nih rualin West Ham, Crystal Palace leh Leicester City-ten thawm an nei nghal.

Dutch striker duhtu zinga sawi Middlesbrough erawh player langsar Victor Valdes an lakluh tawh avangin RVP hi an ngaihven tawh lo nia sawi a ni a, Van Persie duhtu zinga thawm nei na ber erawh Premier League champion Leicester City an ni.

RVP lo kiang rawh le

Kum 2014-ah Manchester United-in coach thar an nei a, a hming chu Louis van Gaal-a ni. Netherlands boss hlui enkawlna hnuaiah Dutch striker Robin Van Persie a tlatlum sawt tura ngaih a ni a, beisei angin thil erawh a kal lo.

Season ṭantir lamah Van Gaal-a'n Van Persie duhsak viau mah se an inhmuthiam lo chho a, October, 2014-a Chelsea an hneh ṭuma goal khungtu RVP hian kawr phelh chungin a goal a lawm a, Dutch striker chet dan hi LVG chuan atthlak a tih thu a sawi.

Van Persie hian West Bromwich Albion laka penalty a pet goal loh hnuah Van Gaal-a'n penalty a pet tir ngai tawh lo a, hliam vangin a buai zui bawk. Season a tawp meuh chuan Van Persie-a'n inelna hrang hranga vawi 29-a inlanah goal 10 chiah a khung a, United-a a season hmasa bera goal 30 khungtu RVP tan season duhawm tia sawi chi a ni lo.

Chona thar

Van Persie a chuai ṭan a, a pu nen an inhmuthiam lo bawk. He boruak karah hian Fenerbahce an lo lang a, July 14, 2015 khan Van Persie-a'n beiseina sang tak nen Turkish club hi a zawm.

Arsenal tan vawi 227 inlana goal 132 khung thei striker man zata Turkish club sum insen zat hi pound maktaduai 3.84 nia tarlan a ni a, kum thum chhung cham turin contract a ziak.

Mahse, a vanglaia khawvel striker hlauhawm ber pawl hian Turkey-ah season khat a hmang hman chauh tihin Fenerbahce chuan an beisei a phak loh avangin hralh an pawi tih loh thu an sawi.

RVP hian Fenerbahce tana season hman zawh takah khan league match 29 khelin goal 14 a khung a, inelna hrang hrangah match 45 khelin goal 20 a khung bawk. Season chhe taka sawi tur ni lo mah se Turkish club beiseina erawh a phak lo.

Foxes an lang e

West Ham leh Crystal Palace ten thawm nei na viau mah se twitter lama a lan dan chuan Van Persie hian Foxes lam a awn zawk niin a lang.

Netherlands tan vawi 101 inlana goal 50 khungtu striker hian tun hnaiah Leicester City striker Jamie Vardy leh winger Riyad Mahrez te chu twitter lamah a follow a, mi 140 chiah follow tu striker chet dan hi khawthlang media-te titi tui ber a ni nghal!

Leicester City-in Premier League no-mawi an chawi khan RVP hian twitter lamah lawmpuina thu a lo tarlang tawh bawk a, season tharah RVP hi Leicester kawr ha chunga kan hmu a nih pawn a mak lo ang.