Green-a'n Leeds United a zawm

Championship club Leeds United chuan England goalkeeper hlui Rob Green chu season thar atan an keeper turin an lalut a, kum khat chhung an hnena cham turin contract an ziahpui.

Kum 36-a upa keeper hi season zawh rualin a club khelhna Queen Park Rangers chuan an chhuah zalen a, Leeds United hian free transfer-in an lalut a ni.

England tana vawi 12 inlan tawh keeper chuan, "Leeds United-in an club-a khel turin min duh tih ka hriat rual khan ngaihtuahna dang ka pu thei tawh lo a, he club tana khelh ringawt hi ka rilruah a awm nghal a ni," a ti.

Norwich leh West Ham tan pawha lo inlan tawh keeper chuan sawi chhunzawmin, "He hmuna ka awm thei hi ka hlim em em a, manager Garry Monk nen inbiakna kan neih hnuah a ruahmannaa tel ve hi ka chak a ni," tiin Leeds United a zawm chhan a sawi.