Bournemouth player manto ber tur Ibe

Liverpool chuan Bournemouth-in pound maktaduai 15-a an rawlthar duhawm Jordon Ibe lakluh an tumna chu an pawm. Reds hian English rawlthar hi Cherries nena an indawr hi an phalsak a, ruahman anga engkim a kaltluan chuan Bournemouth player manto ber a ni dawn tihna a ni.

Bournemouth hian Wolves striker Benik Afobe chu January khan an club chanchina player man-to ber tur ni turin pound maktaduai 10-in an lo lalut tawh a, kuminah vek an club record hi an khum leh dawn niin a lang.

Kum 2011-a Merseyside club-a an player Ibe kaltirtu Wycombe Wanderers-in hlawkna an tel ve dawn. League Two club hian Reds hnena Ibe an hralh khan Liverpool-in an winger hi an chhuahtir leh a nih chuan 15% hlawkna tel ve turin inremna an siam a, Wycombe hi pound maktaduai 2.25-in an hausak belh dawn tihna a ni.

England Under-21 international Ibe hian Liverpool tan match 58 a inlan ve tawh a, nikum nipui laia Raheem Sterling-a'n Manchester City a pan hnuah pound maktaduai 49 man winger hmun ruak hi luah tura beisei a ni. Mahse, Brendan Rodgers-a'n Anfield a chhuahsan hnuah Jurgen Klopp-a hnuaiah beisei angin hmun a chang phak lo.

Liverpool hian an rawlthar beiseiawm hi holam taka kaltir erawh an tum lo, Bournemouth hian Ibe hi an hralh leh a nih chuan a hlawkna an tel ve dawn a, an duh chuan Anfield lamah an la let leh thei bawk ang.