Middlesbrough keeper thar Valdes

Championship aṭang-a Premier League khel tura inpetkai thar Middlesbrough chuan season thar aṭanga an keeper turin Barcelona leh Manchester United goalkeeper hlui Victor Valdes an lalut a, kum hnih chhung atan contract a ziak.

Kum 34-a upa keeper hian Boro a zawm hma hian Premier League-ah Manchester United chu thla 18 atan a lo zawm tawh a, mah se coach Louis van Gaal nen an inhmuhthiam loh avangin Belgian club Standard Liege lamah loan-in a chhuak a ni.

Middlesbrough coach Aitor Karanka chuan Champions League match 106 khel tawh keeper an lalut thei chu a lawm thu sawiin, "Ka hlim dan hi thu a sawi fiah chi pawh a ni lo. Premier League-a kai hlim club tan chuan ani ang player lakluh hi chu a ropui thlawt a ni," a ti.

La Liga Goalkeeper of the Year ṭum hnih lai ni thei Valdes hian Man-chester United a pan hmain a chawr chhuahna Barcelona-ah season 12 chhung hun a hmang a, Catalan club tan hian Champions League no-mawi pathum bakah league title paruk a chawi bawk.