Euro 2016 Final - Pathianni Zan Portugal, Ronaldo Vs Griezmann, France

European Championship 2016 hmawr bawkna chu Pathianni zan dar 12:30 hian Stade de France, Saint Denis-ah neih a ni dawn. Cristiano Ronaldo telna Portugal leh Antoine Griezmann awmna France ten Europe-a football thiam ber ram an zawng ang.

France an lian!

World champion Germany hnehtu an nih avangin France an lian a, 1984 Euro leh 1998 FIFA World Cup an thlen ṭuma champion an nih avangin inelna thlengtu Les Bleus-in Portugal lakah inchhuanna tur an nei a, an intawn hnuhnung 10-a chak zawk France hi chak tura rinkai zawk chu an ni.

France hian final thleng turin goal 13 an khung a, Romania (2-1) leh Albania (2-0) hnehin last 16 an lut a, Switzerland nen goal awm loa inhnehtawkin Group A hmahruaitu an ni. Les Bleus hian knockout stage ringawtah pawh goal kua an khung a, last 16-ah Republic of Ireland lakah talbuai deuh mah se second half -ah harhtharna changin 2-1 in an lehthal a, Iceland (5-2) ) leh Germany (2-0) hmaah harsatna an nei lo.

Inelna ṭantirha rinkai France-in final an thlen meuh chuan game ṭha zawk an khel a, match khat chauh khelh tur a awm tawh chinah phei chuan Les Bleus hian nomawi an chawi ngei a rinawm lehzual.

Portugal ṭha zawk

Group stage-ah Portugal hi Hungary (3-3), Iceland (1-1) leh Austria (3-3) te nen awmin chak hmel an hmu lo a, pathumna nichungin knockout stage an lut. Last 16-ah Portugal hian minute 90 chhungin Croatia lakah chak hmel an hmu thei chuang lo a, extra time-ah Ricardo Quaresma hmangin an chak hram.

Quarterfinal-ah Poland lakah goal chhuah hmasa mah se Renato Sanchez hmangin an sut hram a, penalty-ah 5-3 in an chak. Portugal hi 'draw specialist' tiin an sawi a, semifinal-ah meuh chuan an thiamna phochhuakin Wales 2-0 in an hneh. Portugal hi champion tura rin ni lo mah se Ronaldo telna an nih avangin nomawi chawi thei lo tura dah erawh a rem lo.

Innghahna tlak Ronaldo

Kum 12 liam ta khan Lisbon-ah inelna thlengtu leh champion rinkai ni bawk Portugal leh Greece ten final an khel a, kum 17 chhung hneh loh an tawnna hmunah Portugal an chak lo. Luis Figo thlazar hnuaia khel Ronaldo chu hmuhnawm mah se chak loh vangin hnem theih a ni lo a, kum 19 chauha upa Ronaldo biangah mittui a luang nasa hle.

Ronaldo hi nomawi duhin a tuihal a, kum 12 chhungin Real Madrid forward hian tawnhriat a neih belh chauh ni loin a taksa aṭang pawhin hma a sawn tih a chiang. Portugal captain hian knockout stage an thlen theih nan Hungary lamah goal pawimawh vawi hnih a khung a, Croatia an hneh theih nana a hnathawh hmuh hmaih a thiang lo a, Wales an hneh ṭumin goal hmahruai a khung bawk.

Portugal tan Ronaldo hi innghah-na tlak a ni a, captain phena Nani pawimawh zia te, midfield-a Renato Sanches, Adrien Silva leh Joao Mario te chevel chu team dang tana huphurhawm tham an ni a, bench lamah tawnhriat nei ṭha Joao Moutinho leh Ricardo Quaresma te dah thei an ni.

Wales an hneh ṭumin inhliam vangin Pepe a inlan thei lo a, Real Madrid defender hi a dinhmun la chiang lo cheu a, hrem vanga chhawr theih loh William Carvalho erawh mamawh dan a zira chhawr theih a ni tawh.

Golden boot - Griezmann?

France leh Germany danglamna chu Antoine Griezmann a ni a, Atletico Madrid forward hian goal ruk a khung tawh. Portugal captain-in thilmak a thlentira final-a hattrick a siam a nih ngawt loh chuan Griezmann hian golden boot hi a dawng ngei dawn niin a lang a, hei chauh hi a ni lo golden ball (best player) thlengin a hui thei bawk.

Group stage lamah khelh ṭhat tawk loh vangin bench-ah te pawh
ṭhu ve bawk mah se final-a thlen meuh chuan Griezmann hi player langsar ber a ni. Club inelnaa Griezmann telna Atletico hian Ronaldo khelhna Real Madrid hneh loin Champions League nomawi an chan a, tunah erawh French forward telna hi team ṭha zawk an ni tawh ang.

France tan Dimitri Payet chu inlena ṭantirh lama chhandamtu a ni a, hemi hnu hian Olivier Giroud rawn inlar lehin Paul Pogba leh Blaise Matuidi te chu innghanna tlak an ni reng. Les Bleus-in Germany lakah goal an chhuah lo a, chu chuan an tlarhnung ṭhat zia a tarlang. Khawvelin German keeper Manuel Neuer an fak a, semifinal aṭanga thlir chuan Hugo Lloris chu keeper ṭha zawk a ni.

Eng nge an sawi?

Portugal coach Fernando Santos chuan, "Kum hnih liam ta khan Portugal ka enkawl ṭan a, kan tum chu tun inelnaa final thlen hi a ni. Tunah chuan tun hma zawng aiin team kan inlungrual a, kan ṭha zawk bawk. Final hi ka hun tawn zinga hlu ber a ni a, kan ram tana champion turin kan theihna zawng zawng kan chhuah ang," tiin ram tana an khelh tur thu a sawi.

France coach Didier Deschamps chuan, " Kei chuan player ka nih laiin final ka khel tawh. Euro 2016-a ka enkawl final ka thlenpui theih avangin ka lawm a, ka player-te ka chhuang bawk. France jersey ka ha pha kha ka tan inchhuanna a ni a, player tan hei aia hlu a awm lo. Eng emaw ti lai kha chuan ram jersey hak hlut tawk loh lai chu a awm ngei a, tunah chuan ram mipuite chunga kan thil tih theih kan hrechiang tawh," tiin thinlung zawng zawng nena an khelh thu a sawi.

1998 FIFA World Cup-a an ram ngeia captain ni chunga nomawi chawitu Deschamps chuan, "Inelna thlengtu kan ni a, world champion Germany kan petchhuak bawk. Champion turin kan inringtawk a, Portugal pawhin champion theih an inbeisei ve tho," tiin an chak chian loh thu a sawi.