Inkhel hmuhnawm lantir tumtu Pep

Manchester City manager thar Pep Guardiola chuan Pre-mier League club a zawm hnua a vawi khat nan press conference a nei a, a thusawi langsar ber chu 'inkhel hmuhnawm' lantir a tum thu hi a ni.

Spanish manager hian Bar-celona-ah season li hun a hman chhungin game mawi bik a lantir ṭhin a, mawi taka ball inpe kualin game hmuhnawm an phochhuak a, football ngainatute mit ti tlaitu niin an game mawi hian nomawi 14 lai a keng tel bawk.

He game 'tiki-taka' tia hming an vuah sak hi "City-ah a lantir thei ang em?" tih chu media aṭanga zawhna awm a ni - "Chumi lantir tur chuan alawm he hmunah hian ka lokal" tiin a chhang a, Guardiola a zam lo.

Dai ngai loh ram

Kum 45-a upa manager chuan Barcelona a enkawl lai khan a mamawh zawng zawng a neih kim vek thu a sawi a, Bayern Munich-ah pawh nuam a tih takzet thu a sawi - mahse, manager ropui hian a sawi tel chu chona thar hmachhawn zel a duh thu a ni a, Manchester City-ah chona phurawm tak hmachhawn turin a puanthuah nen a inpulut.

Khawvela football manager hlawh hnem ber chuan, "Christ-mas boruak bawr vela inelna hmachhawnte hi ka thil la tawn ngai loh a ni a, thli tamna stadium leh vawt takah pawh ka la kal ngai lo a, khelmualin duhthu a sam lo bawk. Mahse, he hmunah hian keimah leh keimah infiah turin ka lokal a, Barcelona-a ka naute ka khelhtir ang tho khan he hmunah pawh hian kan thei a ni tih lantir turin ka lokal a ni," tiin a ṭawng huai hle.

'Ka phut sang lo'

Spain leh Germany-ah chuan English football kan sawi chuan "Big Sam" Allardyce nen kan sawizawm ṭhin titu Guardiola chuan a player-te hnen aṭangin thil tam tak a phut loh thu a sawi.

Player a nih laia Barcelona tan pawha lo khel tawh coach chuan, "Ball kan chan chuan a rang thei ang bera chetpui a, chance tam tak insiam hi ka duh chu a ni mai. Player-te ah chiah ka rilru ka pe a, khelmuala an hnathawh dan tur uluk takin ka ngaihtuah bawk, chu chu he hmuna ka lo kalchhan a ni," a ti.

Barcelona-a Champions Lea-gue nomawi vawi hnih chawitu manager chuan sawi chhunzawmin, "Champions League match khel turin Barcelona leh Bayern Munich kha England-ah ka lo hruai tawh ṭhin a, nuam kan ti ṭhin takzet. Tunah chuan he hmuna ka theihna leh thiamna pholan a hun ve ta - hei hi mimal tak pawha ka lo chak tawh ṭhin a ni," tiin Premier League club a enkawl thei tur chu a phur hle.

Upa uapna hnuaiah

Kar hmasa Thawhlehni khan Guardiola-a'n Manchester City chu training a neihpui tawh a, season thum chhung a zawna Champions League semifinal-a Bayern Munich hruai thleng thei coach chuan City hmunhma chu a duhthusam a nih thu a sawi a, player naupang zawk quality nei ṭha tak tak a hmuh thu a sawi tel bawk.

Guardiola chuan, "Player naupang zawkte nena thawhho hi nuam ka ti a, kar khat chhung khan kan rawltharte theihna leh thiamna avangin ka hlim em em a ni," a ti.

Hetihrual hian Spanish coach chuan player senior ho pawh an innghahna an nih thu a hrilh a, captain Vincent Kompany leh Barcelona-a a hnawl hnu midfielder Yaya Toure-te pawh team tan an pawimawh tur thu a hrilh - chhuak tur anga sawi Ivory Coast midfielder hi a cham chhunzawm zel a nih pawhin a mak lo ang.

Kan tum phawt ang

Barcelona B team aṭang-a a coaching career ṭantu Guar--diola chuan City captain inhliam ngun ve tak Kompany chungchang a sawi lang tel nghal a, a defender pawimawh chu in fit thuai turin a duh.

Bayern manager hlui chuan, "Kompany tana ka duhthusam awmchhun chu ṭha taka a inkhelh theih hi a ni. Defender ṭha tak a ni a, a dam thuai theih nan a taksa chauh ngaihtuah turin ka hrilh a ni," a ti.

Guardiola chuan match tina chak a duh thu sawi bawkin, "Kan match tinah hnehna chan zel a, chawl miah loa hmalam pan zel thei turin kan inbuatsaih ang. Match zawng zawngah hnehna chan a harsa mai thei a, mah se kan tum phawt a
ṭul a ni," tiin Premier League nomawi chawi ngei a tum.

August 13-ah City-in tun season Premier League-a an match hmasa ber Sunderland nen an khel dawn a - Guardiola tan fiahna hun a inṭan dawn tihna a ni.