Chawlh ka la ngaihtuah lo - Federer

Wimbledon 2016 semifinal aṭangin tla mah se Roger Federer chuan tennis chawlhsan tumna a la neih loh thu leh Centre Court-a a la inkhelh theih a beisei thu a sawi chhuak.

Kum 34-a upa Federer hian Zirtawpni zan khan Milos Raonic chu 6-3, 6-7 (3-7), 4-6, 7-5, 6-3 in a hneh lo a, semifinal inkhel dangah Andy Murray chuan Tomas Berdych lakah 6-3, 6-3, 6-3 in hnehna a lo chang ve bawk. Nizan khan khawtual tlangval Murray leh Canadian zinga Wimbledon final khel hmasa ber Raonic te hian final an khel a, result kan hre hman lo.

Swiss thiampuipa Federer hi a kum a tam ve deh tawh a, a bik takin Grand Slam inelnaah a hlawhtling thei tawh meuh lo. Wimbledon semifinal a vawi 11 nan khel mah se a ṭum khat nan a chak lo a, a hmalam hun an zawt zui hi a mak tawh lo.

Zawhna chhangin Federer chuan, "Chiang taka ka sawi duh chu Centre Court-ah hian ka la inkhelh leh theih ngei ka beisei. Mipui min ṭantuten min duhsakna an lantir ṭhin a, ka lawm hle. He hi kan tan Wimbledon hnuhnung ber a ni ang tiin ngaihtuahna ka la siam duh lo," a ti. Grand Slam vawi 17 champion tawh hi Court a chhuhsan dawnah inkhel entute chuan zahna lantir nan ding chungin an thlah.

Wimbledon 2016-ah hian Federer hian a match hmasa paliah set hmasa pathum la zelin harsa lo takin hnehna a chang thei zel. Mahse, quarterfinal leh semifinal chu ni thum chhungin a khelh a ngai a, set nga ve ve khelh a ngaih zui bawk avangin a tawp lamah a tha a uaithla deuh tawh tih hmuh theih a ni.

Wimbledon vawi sarih champion tawh chuan sawi chhunzawmin, "He lai hmuna vawi riat champion theih chu duhthusam a ni a, mahse hei hi ka tennis khelh chhan ber a ni bik lo," tiin record siam tum ngawr ngawr a nih loh thu a sawi tel bawk.

A tharum aia a thiamna hmang nasa a nih avangin Federer hi a kum rualpuite ngaihtuah chuan player ṭha tak a la ni. Mahse, kuminah a khup leh hnungzâng na vangin a buai ve fo - 1999 aṭang khan major tournament-ah inlan zawn char char mah se a vawi khat nan French Open kha a khel thei lo a, tunah lo kir mah se a hlawhtling thei ta rih lo.

Champion nomawi chawi lo mah se Federer inkhel entute tan chuan a thiam zia hmuh hmaih theih a la ni lo a, a hrisel ṭha a nih chuan a la champion leh lo ang tih a sawi theih lo. August thla a neih tur Rio Olympic-ah pawh Switzerland tana inlan tura beisei a ni.