Wales manager-in a hmalam tichiang

Chris Coleman chuan 2018 World Cup chu Wales manager a nih hnuhnun ber tur a nih thu a sawi.

Kum 46-a upa Coleman chuan, "2018 World Cup kan tling emaw tling lo emaw hemi bak chu Wales manager hna ka chelh chhunzawm lo ang," tiin a hma lam hun atana thutlukna a siam thu a sawi.

Wales hian Euro 2016-ah semifinal an thleng a, Portugal hneh lo mah se Coleman-a hote hi an result avangin fak an hlawh hle.

Wales boss Coleman chuan, "Kan ram team ka enkawl tawh loh meuh chuan kum ruk aṭanga kum sarih ka enkawl dawn tihna a ni a, chu chu hun rei tak a ni. Chutihrualin chhuah ka tum avangin hna dang ka zawng nghal dawn tihna a ni lo a, ka hun tawp ṭha taka hmang turin theihtawp ka chhuah dawn," tiin result ṭha taka nena chhuah a duh thu a sawi.

Thla nga liam ta kha chuan Wales hi FIFA ranking-ah 117-naah an awm a, Coleman-a hnuaia an match hmasa paliah an chak lo vek. Amaherawhchu tunah erawh an hlawhltin lai ber hun an tawng chho a, 1958 World Cup hnuah a vawi khat nan inelna lian hmachhawnin an ram history-a a vawi khat nan semifinal an thleng bawk.

Wales manager hian Euro 2016 hma khan contract a ziak hman a, inelna zawh chu nise a hlawh thlengin a pung ang. Hemi chungchang hi sawiin Coleman chuan, "Contract ka ziah hi a ṭha tawk a, inchhirna tur ka nei lo. Hemi hmang zo tur hian theihtawp ka chhuah ang," tiin a sawi.

Wales hi FIFA World cup qua-lifier Group D-ah Austria, Serbia, Republic of Ireland, Moldova leh Georgia te nen an awm a, an match hmasa ber hi Molodova nen September 5, 2016 khian an khel ang.