Wimbledon Serena a vul - Steffi record a tluk ta

World number 1 Serena Williams chuan seeded palina Angelique Kerber henhin a vawi sarih nan khawvela tennis tournament upa ber Wimbledon champion a ni.

American star hian major tournament-a vawi 22 champion thei Steffi Graf record nih rual chiahin Open Era-ah (1968 hnu lam) anni pahnih aia sulhnu nei ṭha an awm lo. Serena hi kum 34-a upa ni tawh mah se a u Venus Williams-i'n kumin Wimbledon-ah semifinal a la lut thei a, German legend sulhnu ropui hi a khum thuai dawn niin a lang.

Inrinni zan khan Centre Court-ah thli thaw nasa deuh nachungin Serena a buai phah lo, darkar khat leh minute 21 chhungin 7-5, 6-3 in hnehna a chang.

Dan theih loh Serena

Final khelh a nih hmain Serena-i'n champion ngei a tum thu leh Steffi Graf record nihrual theih a châk thu a sawi. Mahse, a khingpui tur hi German nula Kerber a nih avangin a awlsam dawn lo tih a chiang a, kumin Australian Open final-a a hneh loh hnu a nih bawk avangin inkhel ngaihven hlawh bik a ni.

Inkhel ṭan phat aṭanga a tawp thlengin Serena hi beisei phak bakin a khel ṭha a, a service a hum vek bakah hnufual lai a nei miah lo. Set khatnaah an service hloh loin 5-5 thleng an kaltluang a, hun pawimawhah world number 1 hian Kerber service chhuhsakin set a la zui.

Set hnihnaah pawh Serena bawk a che fuh zawkah a ṭang leh a, service hmasain 4-3 a hma a hruai hnuah Kerber service a chhuhsak leh a, a tawp thlengin a chesual tawh lo. Inkhel pumpuiah Serena hian vawi 13 ngawt ace siamin a service a hloh miah lo a, break point vawi ruk a hmuh aṭanga vawi hnih a hman ṭangkai chu ropuina rama hruailut turin a tawk.

Slam Serena

Grand Slam tournament a hlawhtling berte zinga mi a nih vanga a hming lemah 'Slam Serena' an tih mai hian 1999 US Open-ah khan champion lai Lindsay Davenport hnehin final a lut a, world number 1 Martina Hingis hneh zui lehin a vawi khat nan major tournament-ah a champion.

African-American tennis star hian hnungtawlh aiin hmalam pan a thlang a, Australian Open (2003, 2005, 2007, 2009, 2010, 2015), French Open (2002, 2013, 2015), Wimbledon (2002, 2003, 2009, 2010, 2012, 2015, 2016) leh US Open (1999, 2002, 2008, 2012, 2013, 2014) cham--pion a nihna hi tennis khawvelah chuan kumkhaw sawi a tling tawh ang.

Professional player leh eizawn nana hmang ve lem lo, mahni tuipui vanga tennis khelte chu Grand Slam tournament-a an inel ve theih chin kum 1968 hnulam hi Tennis khawvelah chuan 'Open Era' tih a sawi a ni. Hemi hmalam hi chuan Grand Slam leh National Tennis League (NTL) buatsaih inelna bakah Davis Cup-ah te chuan mahni nuam tih vanga tennis khelte an inel ṭhin.

Open Era-ah chuan Steffi Graf leh Serena te hi hmeichhe single Grand Slam champion hnem ber (22) an ni ta a, tennis chanchin hrim hrima champion hnem ber chu Margaret Court a ni thung. Australian legend hi major tournament-ah vawi 24 champion in, a title 13 erawh Open Era hmalama a lak a ni thung.

A awlsam lo

"Rim tak leh chhel taka ka beih hnua ka hlawhchhuah a nih avangin a hlu bik" tiin Grand Slam title 22-na a lak hnuah Serena chuan a sawi. He thu hian a zinkawng chu a mam purh bik lo tih a lantir.

Serena hi a khelh ṭhat tluan ber lai a ni bik lo a, hneh theih a nih zia player dangten an hre tawh. Nikum khan US Open semifinal-ah tlain, kumina Grand Slam hmasa ber Australian Open final-ah Kerber a hneh lo - French Open final-ah Garbine Muguruza a hneh loh leh bawk avangin tun ṭumah hian champion chiangsa a dah a ni lo.

Wimbledon 2016-ah inrintawkna sang tak nen a inlan zui a, second round-ah American Christina McHale chuan chhaih buaiin set khat chhuhsak ve mah se a talbuai chhunzawm lo a, final thleng hian set a hloh zui tawh lo a ni.

A champon hlimin Serena chuan, "He hmuna hlawhtlina ka chang hi a ropui tak zet. A hmasa berah chuan Pathian chungah lawmthu ka sawi a, ani tel lo chuan hetiang dinhmunah hian ka sing thei lo. Ka chhungkua leh team chungah lawm thu ka sawi bawk," a ti.

2002 Wimbledon champion a nih hnuah Serena hian a vawi sarih nana hlawhtlinna chang leh tur hian kum 14 zet a nghah a
ṭul a, ṭhangkhatlian zet a lo inlan tawhna hi a chenna in ang main a ngai tawh.

Zawhna chhangin Serena chuan, "Centre Court hi chu ka tan in ang mai a ni. He hmuna inkhelh hi nuam ka tiin hmun dang zawng aiin a danglam bik a, inkhel turin ka lo la kir leh ngei ang," a ti. Angelique chu player ropui tak leh theihna sang tak nei a nih zia a sawi lang tel bawk.

Kerber-i'n a lawmpui

German nula Kerber tan chuan a naupan lai aṭanga a idol leh hnampui ni bawk Steffi Graf record humhim sak tur leh a vawi khat nan Wimbledon champoin nih kha a duhthusam a ni ngei ang.

Mahse, infiamnaah chuan duh leh beisei angin thil a kal vel lem lo. Australian Open champion Kerber hi a ball vuak nain a backhand ṭha viau mah se a khingpui a chetsual duh miah loh avangin a vanduai zawka a ṭan a ṭul.

A vawi khat nana Wimbledon final kheltu Kerber chuan, "Serena ka lawmpui che a, he dinhmuna din hi i phu a ni. Nang hi champion ropui chu i ni a, nang ka hmachhawn thei ringawt che pawh hi ka tan chuan chawimawina a ni zawk hial," tiin a hneh loh chu a chawimawi let thiam hle.

Centre Court chungchang sawi chhun-zawmin, "He hmuna ka inkhel ve thei hi ka lawm a, mipui min ṭantute hi an puitlingin phurna turin boruak an lo siam thiam hle," tiin a hnufual zawka a ṭan lai pawha lo au phur tute a fak.

Karleha WTA ranking chhuak tharah chuan Kerber hi pahnihna a ni dawn a, kum 2013 February thla aṭanga number 1 nihna hauhtawh Serena hnuaiah number 2 vawi 20 zet an inthlak kualna tur chiah a ni ang.

Kum 1999 a tennis lo chawlhsan tawhtu Steffi Graf chuan Facebook-ah lawmpuina thu ziakiin, "Serena Williams-i'n Wimbledon a khelh dan hi chu a ropui thlawt a ni. Vawi 22 a champion thei hi a ropuiin a la hlawhtlin belh pawhin a rinawm, infiamna ngainatute tan chuan ani lo ṭan hi tihawm tak a ni," tiin a record nihrualtu a lawmpui a, a hnampuinu Kerber chu a theihna sang tak nei leh rilru huaisenna avangin fak tlak a nih thu a sawi tel bawk.