Kumin transfer sum chevel a tam

Transfer hun hawn aṭanga kar khat chhungin Premier League club-te chuan pound maktaduai 300 an hmang der tawh.

Nikum nipui transfer khan pound maktaduai 870 hman a ni a, sumdawnna lam zirchiang ṭhin Deloitte chuan kumin hian tlukleh-dingawn khat aia tam Premier League club ten an hman an rin thu a sawi.

2014-15 season khan nipui leh thlasik transfer huna sum chevel chu pound maktaduai 965 a ni a, season liam ta kha chuan transfer hun pahnih belhkhawm chu tluklehdingawn 1.045 a ni thung.

Tun season-ah sum chevel tam chhan chu Premier League-in television deal aṭangin kum thum chhung atan pound tluklehdingawn 5 an hmu a, hei vang hian 2016-17 season hian club ten pound maktaduai 30-50 an dawn theih beisei a ni.

Manchester United chuan Borus-sia Dortmund midfielder Henrikh Mkhitaryan (£26m) leh Villarreal defender Eric Bailly (£30m) lakluh nan pound maktaduai 60 dawn an hmang tawh a, an ṭhenawm Manchester City-in Dortmund midfielder Ilkay Gundogan (£20m) leh Celta Vigo forward Nolito (£13.8m) te an lalut tawh bawk.

Club lian dang Arsenal leh Liverpool ten Borussia Mon-chengladbach midfielder Granit Xhaka (£35m) leh Southampton forward Sadio Mane (£34m) te an lalut tawh a, champion lai Leicester City pawhin player pali vel lakluh nan pound maktaduai 30 chuang an hmang tawh bawk. Thuthang leng vel thlirin player lut tur an la tam niin a lang a, transfer a la ngaihnawm dawn chauh.