Petr Cech-a'n Czech Republic kawr a hlip

Arsenal goalkeeper Petr Cech chuan Czech Republic tan match 124 zet a khelh hnuah ram tana inkhel chhunzawm tawh lo turin thutlukna a siam ta.

Kum 34-a upa Cech hian 2002 February thla kan Hungary an hmachhawn ṭumin international match hmasa ber khelin hemi hnu hi chuan a dam a nih phawt chuan Czech tana koh hmaih a ni ngai lo, a chawlh thleng hian ani aia an ram tana khel hnem an awm lo - thla hmasa a Turkey nen an inkhelh ṭum kha an ram jersey a hak hnuhnun ber a ni ta.

Ram tan player ṭangkai leh naupang zawkte entawk tlak niin 2006 World Cup-ah a inlan a, European Championship-ah ṭum li inlanin Euro 2004 khan semifinal a hruai thleng. Euro 2016-ah erawh beisei an phak lo a, knock out round pawh lut loin an puanthuah an tel a ṭul.

Chelsea keeper hlui Cech chuan Czech Republic Football Association (FACR) hnenah kum 14 zet a lo chenchilh tawh international career a mangṭha thu sawiin,"Euro-a kan chet ṭhat loh vang a ni lo a, ram tana khelh chawlhsan hi a hun ve ta ni. 100% a thil tih duh mi ka ni a, nakinah chuan hetiang ka theih loh hun hi a la thleng dawn a, tunah erawh a la ni lo," tin club football erawh chawlhsan mai a la tum lo.

Czech keeper ropui Cech chuan chhunzawmin, "Tunah hian kum 34-a upa ka ni tawh a, international major tournament hnai ber chu kum hnih danah daih a ni tawh a, football-ah chuan dam rei nghah thil a la ni," tiin 2018 Russia World Cup khelh a inbeisei tawh lo.

Season hmasa ṭan dawna Gunners zawmtu Cech chuan, "Ka naupan laia ka duhthusam pakhat chu Czech tana vawi khat tal inkhelh ve a ni ṭhin, ram tana ka inkhelh khan hlimna min thlen ṭhin a, ka hun tawnte kha ka theihnghilh tawh ngai lo ang," tiin ram tana a khel thei chu lawmawm a tih thu a sawi.

FACR chuan, "Petr Cech chuan ram tana inkhelh a chawlhsan thu a puang ta! Czech tan match 124 a khel a, ani aia khel tam an awm lo. Petr, ram tana i thiltih avang hian kan lawm e," tiin thuchhuah an siam.