Wimbledon Britain lawm nan Murray a champion

Andy Murray chuan Milos Raonic hnehin Wimbledon 2016 nomawi a chawi. An duh leh beisei, rilrua an lo suang-tuah ṭhin leh duhthusam thlen dik tirtu Murray hi Wimbledon khelh a nih chhung chuan Britain mipuite chuan an theihnghilh tawh ngai lo ang.

Pathianni zan khan Centre Court-ah mipa final hi khelh niin chhum zing a tam a, ni lan chhunah a sat em avangin service-ah harsatna an tawk deuh. World number 2 Murray hian seeded parukna Raonic hi darkar hnih leh minute sawmli pariat chhungin 6-4, 7-6 (7-3), 7-6 (7-2) a hnehin kum 2013-a alo hlawhtlina tawhna hmunah a ropui nawn leh - Britain fachuam hian Grand Slam title pathum a lakna chiah a ni.

Canadian tlangval Raonic erawhin an ram chanchina a vawi khat nan Grand Slam champion hmasa ber nih a tumna a thlawn rih a, bung thar kai tur chuan a nghah leh rih a ngai dawn.

Ruahmanna fuh

Final thleng turin Canadian tlangval Raonic-a'n match ruk a khelh aṭangin ace vawi 137 teh meuh a siam thei a, tun tournament-a service na ber niin 144mph record siam theitu a ni - final-ah hian amah vekin 147mph-in a khum. A ball vuak a nat bakah coach John McEnroe kaihhruaina hnuaiah attacking game hmuhnawm a khel.

Amaherawhchu, Grand Slam vawi hnih a champion theih nana lo pui tawhtu Ivan Lendl chu Murray-a nen June thla aṭang khan an thawk dun leh tawh a, Czech Republic coach kaihhruaina hnuaiah Britain number 1 hian defensive game turu lutuk khelin a hlawhtlinpui leh ta.

Kum 29-a upa Murray hian a service a hum tluan vek a, break point ṭum sarih a hmuh aṭangin vawi khat chauh chhuhsak thei mah se tie-break an khelh vawi hnihah erawh 5-0 ve ve in hma a hruai thei. A chesual thei lo a ni ber a, a khingpui tana lehthal theihna hun a siamsak miah lo a ni.

Raonic tan erawh champion tuma a ruahman lawkna chu
ṭha hle mah se Murray hneh nan a tawk zo lo. A vawi khat nana Wimbledon final kheltu hian a ball vuak nat chhawr ṭangkai tumin ball a vuak let hnuah a tawlh hma deuh ziah a, ṭum 74 zet net lamah tlan pheiin a khingpui nawr chiai a tum.

Mahse, tawnhriat nei ṭha Murray a chhaih buai zo lo, Rao-nic hi vawi 74 a tawlh hma
aṭangin ṭum 46 chiah a hlawh-tling a, set hmasa pahniha a vanneih pui tawh loh hnua a khelh dan thlak lo a, a ngai renga a khel zui kha a ngaihtuah nawn hnuah a la inchhir mai thei.

Hetihlai hian Murray erawhin baseline aṭanga na taka ball vuak let a thlang zawk a, forehand a tihsual mang loh bakah backhand a nei ṭha bawka, net lamah ṭum 22 a tlan chhuah
aṭanga vawi 17 ngawt a che fuh zawka a ṭan avangin champion phu khawpin a khel ṭha.

Murray hian nikum Novem-ber thla khan an ram chu kum 1936 hnua a vawi khat nan Davis Cup-ah a champion pui tawh bawk a, he mi ṭum hian single match bakah double-ah a inlan nghe nghe. Britain tennis tana a hnathawh hi a ropui a, fak a phuin an la fak zel bawk ang.

A phu e...

Kum 2012 khan Murray-a'n a vawi khat nan Wimbledon final a khel a, Roger Federer hneh loa a chak loh avangin a biangah mittui a luang. Thla 12 a liam hnuah final lut lehin Novak Djokovic a hneh a, a lungngaih mittui chu lawmna mittuiin a thlak.

British mipui ten kum 77 chhung teh meuh mai an lo nghah tawh 'Khawtual tlangval champion lai' ngei chu kum 2013 khan Murray hmangin an hmu a, an lawmna siamsak tawhtu bawkin hlimna a thlen leh ta.

Fred Perry (1935) hnua Bri-tish player zinga vawi khat aia tam Wimbledon champion ni leh thei hmasa ber Murray chuan, "Ka kut ngeia nomawi ka chawi kang leh thei hi ka inchhuang. He hmun hi chu ka tan engtiklai pawhin a pawimawh bik em em, hnehna chan a nawm tluk zetin chak lo zawka ṭan hrehawm zia pawh ka hre tawh. Tlawm zawka
ṭan lungngaihthlak zia ka hriat avangin hnehtu nih hi a hlu zual," tiin a sawi.

Murray hian tun ṭum hi Grand Slam final vawi 11 a khelhna chiah a ni a, tun hmaa a khelh vawi 10-ah te chuan Federer emawh Novak Djokovic emaw a hmachhawn ziah, tun ṭum hi anni pahnih ni lo major tournament final-a a hmachhawn hmasak ber a ni.

Djokovic leh Federer a hma-chhawn loh ṭum pawhin Murray hian final kalkawngah 2009 khan Andy Roddick a ngam lo a, semifinal-ah Rafael Nadal-a'n
ṭum hnih a vaw tla tawh bawk.

Tennis chanchina player
ṭha leh langsar ber ber Grand Slam vawi 17 champion tawh Federer, Rafael Nadal (14) leh Djokovic (12) te nen an vanglai a inrual miau avangin Murray hi a ropui tur angin a ropui tawk lo a ni thei - a thiam, theihna leh huaisenna thlir chuan hei aia tam nomawi chawi hi a phu.

Grand Slam vawi riat cham-pion tawh coach Lendl kaihhruaina hnuaiah Murray-a'n beiseina a nei thar leh ta a, "Ani hi hruaitu ṭha a ni a, a thusawi hi ka ring nghal thlap zel. A kaihhruaina hnuaiah hian ka khel ṭha ṭhin a, ka hmaah hian tennis nun hlimawm tak a awm chhunzawm zel ka beisei," a ti.

A la tawp lo

Kum 2002 khan Lleyton Hewitt-a'n Wimbledon nomawi a chawi a, hemi hnu hian player langsar pali (Roger Federer, Rafael Nadal, Novak Djokovic leh Murray) te ni lo midang he hmunah hian an la champion miah lo. Hei bakah hian Canadian mipa zingah Grand Slam champion an la awm lo.

He record duhawm lo tak thaibo tur hian Raonic rawn ding chhuak mah se a vawi khatnaah chuan a hlawhtling lo phawt. Mahse, kum 25-a upa Raonic hian champion tura theihna a neih zia chu semifinal-a Federer a hneh dan aṭang khan hmuh hmaih theih a ni lo a, a hun a la thleng ve ngeiin a rinawm.

A lo kir leh tur thu sawiin Raonic chuan, "Centre Court-a grass hi a hring a nih chhung chuan he hmuna inkhel tur hian ka lo kir leh ang. Hlawhtlinna ka chan theih nan nitin hmasawn ka tum dawn a, tun aia ṭha zawk hian ka lo kir leh ang. Ka team leh chhungkaw chungah lawmthu ka sawi a, kei hi enkawl nuam tak ka ni chungin dawhthei taka min
ṭanpuite hian fak an phu," a ti. Champion Murray chu nomawi chawi phu zawk a nih thu leh a lawmpui thu a sawi tel bawk.