Schweini tan chawlh a hun - Michael Ballack

Germany midfielder ropui chawl ta Michael Ballack chuan an ram captain Bastian Schwein-steiger chu international foot-ball chawlhsan tawh turin thurawn a pe. Manchester United midfielder hian Euro 2016 khelh zawh takah match khat chiah inkhel bul a ṭan a, fit lo chunga France-a inkhel tura hruai tel midfielder hian inkhel bul a ṭan chhun semifinal-ah handball vangin penalty a chawi bawk.

Schweinsteiger nen-a lo khel tawh ṭhin Ballack chuan, "Schweini hian ram tana inkhelh a chawlhsan a hun tawh a ni. Ani ang player hi chuan tum sang tak an nei tih ka hria a, mah se tun hnai kum hnih chhunga a khelh dan chu kan hmu vek a ni. Dik taka sawi chuan a inhliam ngun vang leh a taksa a chak tawh loh avangin ka lo lungngaih pui ṭhin," tiin a ṭhianpa chuan tun hma a phak tawh loh thu a sawi.

Germany tan vawi 98 inlana goal 42 khung thei midfielder chuan sawi chhunzawmin, "Bastian hian Russia World Cup khelh a tum leh tum loh ka hre lo a, mah se Manchester United-ah hmun pawimawh chang tura theihtawpa a beih a ngaih bawk si avangin a kal zel dan tur hi uluk taka a ngaihtuah a ngai. A taksa zawh tawk loh thleng a inkhel ang a, player dangin an nekchhuak ang tih ka hlau a ni. Bastian hian chu chu a phu lo," tiin a ṭhianpa chu a hming-
ṭhat laia chawl mai turin thurawn a pe.

Bastian Schweinstei-ger hian Germany tan match 120 inlanin goal 24 a khung tawh a, kum 2014 World Cup nomawi an chawina kawngah player pawimawh pawl niin kum 2006 leh 2010-a pathumna an nih ṭum pawhin squad-ah a lo tel tawh bawk.