Euro 2016-a goal khung hnem ber Griezmann

Antoine Griezmann-a'n an khawtualah Euro nomawi chawi zo lo mah se Golden Boot chawimawina nen Euro 2016 a khar - France forward hian inelna neih chhung zawngin goal ruk a khung a, amah hnaih bertu aia goal a khung tamna chu goal thum a ni.

Silver Boot dawngtu Cristiano Ronaldo-a'n goal thum a khung a, goal thum khung thei dang player panga awm mah se assist (3) ngah ber a nih avangin Silver boot chawimawina hi pek a ni. Goal thum khung zingah Olivier Giroud chu Bronze Boot chawimawina pek a ni a, Arsenal striker hian pathumna dinhmun luah tur hian goal thum a khung bakah assist (2) a nei.

Golden boot zinkawng

Atletico Madrid forward Griezmann-a'n goal ruk khung turin Euro 2016 match zawng zawng a khel kim vek a, minute 555 bak khelmual chhunga inlan a mamawh lo - a
ṭhiante thun tur vawi hnih a siamsak bawk.

Kum 25-a upa forward hian group stage-a an match hnihna Albania nen an khelh
ṭumin tun Euro-a a goal hmasa ber a khung a, a hawi kir tawh lo. Last 16-ah Republic of Ireland chu 2-1 in an hneh a, he inkhela goal hnih hi Griezmann-a khung a ni.

Quarterfinal-ah France-in 5-2 in Iceland an sawp a, Griezmann-a'n goal khat a thawh ve leh. Semifinal a ni a, France leh Germany an inhmachhawn dawn - inkhel pawimawhah Griezmann-a'n a ṭangkaina a lantir a, World champion lamah goal hnih a khung.

Final-ah France tan vawi 33 inlana goal 13 khungtu forward hian goal khung tawh lo mah se Golden Boot chawimawina hlawhchhuak turin goal ruk khung a tawk.

Griezmann hian Euro tournament khata goal khung hnem ber pahnihna dinhmun a luah nghal a, a chungah hian kum 1984-a goal kua khungtu French legend Michel Platini chiah a awm.

Griezmann a hlim zo lo

Euro final-ah an ram team a hruai thleng a, tournament-a goal khung hnem ber a ni bawk - player tam tak tan chuan season hman zawh taka Atletico Madrid tana goal 32 khungtu Griezmann-a thlen chin hi lawmna tur chi a ni.

Mahse, Real Sociedad-a a career ṭantu forward chuan, "Nakinah chuan ka chawi­mawina dawn hi chhuang takin ka la thlirkir ve mahna, mah se tun dinhmuna pawimawh zawk chu team pumpui hi a ni," tiin Golden Boot dawng mah se Euro nomawi an chawi loh miau avangin a lawm a kim thei lo.

Griezmann chuan sawi chhunzawmin, "Ka teammate-te tawrhna ka hriatthiampui em em a, an tan Euro nomawi hlawhchhuah duh hle mah ila goal ka khung thei si lo. Kan tan chuan he game hi a nunrawng a, chumi rual chiah chuan a ropui em em bawk si," tiin an dinhmun a sawifiah thiam hle.

Euro final hial thleng mah se Griezmann chuan zir tur an la neih thu sawiin, "Zinkawng hlimawm tak kan zawh a, chumi rual chuan hrehawm tam tak kan tuar bawk. Mahse, kan tan chuan engkim hi zirlai a ni a, kan inzir chho zel ang. Kan theihna zawng zawng kan pe a, inchhirna kan nei lo," a ti.

Mite duh loh kha...

Euro 2016-ah Griezmann a vul a, Atletico Madrid forward hian football khawvel ngaihven a hlawh nghal - khawvela eng club pawhin an duh tur khawpa player ṭha hi club pasarih laiin an lo hnawl tawh!

Kum 13-a upa a nih laiin Griezmann hian club khelhna tur a nei mai lo a, a tet em avangin a hlawhtlin theih an ring lo - mah se huaisenna, tumruhna leh thawhrimna ṭangkawp chuan vawiin dinhmunah Griezmann a hruai thleng.

Feet 5 leh inches 9-a sang forward chuan a hun tawn thlirkirin, "Khatih hunlai khan feet ruk tal kai thei tura an beisei loh kha chu player atan an duh lo a, hmalam hunah eng thil nge thleng thei tih an ngaihtuah phak lo," tiin a hlawhtlinna chu a chhuang hle.

Mite duhloh Griezmann thiamna hi Real Sociedad erawhin an hmuh hmaih ve lo. An khaw club Macon tana a khelh laiin French club Montpellier-ah trial a nei a, Paris Saint-Germain youth academy naupangte nen an inhmachhawn ṭumin enchhin nan khelhtir ve a ni.

Spanish club Sociedad-ten Griezmann-a thiamna an hmuh hmaih loh a, an club-a trial turin an sawm. Kar khat trial a neih hnuah kar hnih dang cham tura sawm a ni a, kar hnih enchhin a nih hnuah contract an zawrh - hei hi Griezmann tak tak inṭanna chu a ni.

Hei le Griezmann

Uruguayan manager Martin Lasarte hnuaiah Griezmann-a'n 2009 khan a professional match hmasa ber a khel a, pre-season campaign-a vawi li a inlanah goal nga a khung theih avangin South American coach lar hian 2009-10 chhungin match 40 a khelhtir nghal.

French forward hian Real Sociedad-ah season nga hun hman chhunzawmin vawi 201 a inlan a, goal 52 a khung. Kum 2014-ah amah chher liantu club chhuahsanin Atletico Madrid a zawm a, a man zat atana Atletico insen zat hi pound maktaduai 24 a ni.

Vicente Calderon-a a inlan hnuah Griez­mann-a'n hmasawn zawngin ke a pen. Diego Simeone-a hnuaia a season hmasa bera inelna hrang hranga match 53-a inlanah goal 25 a khung nghal a, Atletico Madrid fan-te ngaihzawn rawn a ni.

A season hnihnaah Griezmann ṭha zawk kan hmuh chhunzawm a, inelna hrang hrangah match 54 inlanin goal 32 a khung - Euro khelh a ni a, goal ruk khunga tournament a khar meuh chuan football ngainatute zingah tu nge Griezmann? tia inzawh nawn a ngai tawh lo.