An ramah Hamilton a ropui
Pathianni zan khan Silverstone tlankawngah Formula 1 British Grand Prix tlan a ni a, khawtual tlangval Lewis Hamilton chu an ramah a zawna vawi thum hnehna chang thei hmasa ber ni turin pakhatna a ni - championship lamah a teammate Nico Rosberg nen an inthlauhna chu point khat chiah a ni ta.
Ruah sur leh chhum zing vangin British Grand Prix chu lap nga an tlan hman chauh tihah a khaihlak a, kawng huh tak hnuaia intlansiakah Mercedes driver Hamilton hian a tir aṭanga a tawp thlengin harsatna lian tham tawk loin hnehna a chang. German driver Rosberg chu pahnihnaah thlengin tunlai F1 driver zinga rawlthar duhawm ber tih ngam Max Verstappen chu pathumna a ni thung.
Kum 31-a upa Hamilton ti tun hnai-ah a cheṭha tluang viau a, intlansiak hnuhnung pangaah vawi li ngawt hneh-na a chang thei. Season tir khan Rosberg-a'n a zawnin vawi li ngawt hnehna a chan theih avangin Hamilton-a'n a champion nomawi a hloh ngei dawn niin a lang hman a, mah se tunah erawh an inthlauhna point khat chauh a nih leh tawh avang leh intlansiak hmabak 11 ngawt a la awm avangin champion tur rinthiam a har ta hle.
Mercedes F1 team boss Toto Wolff chuan, "Lewis kha a tir aṭangin a che fuh nghal a, heting khuaah hi chuan ani hi chu hneh theih loh ang mai a ni," a ti. Pahnihna dinhmun luahtu Rosberg pawhin beisei ang ngeia ṭhaa car a khalh thu a sawi bawk. Wolff hian intlansiak
ṭan hmain a driver pahnihte chu anmahni an inti palh leh a nih chuan hrem an nih tur thu a lo hrilh lawk tawh a ni.
Force India pawh a ti kimtu an ni satliah lo a, champion tura inel zingah lang phak rih lo mah se team ṭha ber pawl an ni. British GP-ah hian an driver pahnih Sergio Perez (6) leh Nico Hulkenberg (7) ten point an hmuh leh tak avangin constructors' championship-ah point 73 an hmu ta a, pangana dinhmun an luah.
Force India team principal Vijay Mallya chuan, "Point 14 kan hmuh belh leh ta a, intlansiak 11 kan la hmabak
aṭang hian kan chunga mi umphak ngei kan tum dawn a, palina kan ni thei a nih chuan a lawmawm ang," tiin anmahni aia point 19-a sang zawk Williams umphak an tum thu a sawi.
FORMULA ONE BRITISH GRAND PRIX RESULTS
1 Lewis Hamilton Gbr Mercedes
2 Max Verstappen Hol Red Bull
3 Nico Rosberg Ger Mercedes
4 Daniel Ricciardo Aus Red Bull
5 Kimi Raikkonen Fin Ferrari
6 Sergio Perez Mex Force India
7 Nico Hulkenberg Ger Force India
8 Carlos Sainz Spa Toro Rosso
9 Sebastian Vettel Ger Ferrari
10 Daniil Kvyat Rus Toro Rosso