England manager hna ka hnar lo - Wenger

Arsenal boss Arsene Wenger chuan England manager hna chu a hnar lem loh thu a sawi a, mah se club football a tuipui zawk thu a sawi zui bawk.

England hi Euro 2016 last 16-ah Iceland hneh loin an tla a, manager Roy Hodgson chuan a hna bansanin a hmun ruak luah tur hian manager hming hrang hrang lam rik ni mah se tun thlengin Football Association chuan a hmun ruak luahkhat tur an la thlang fel thei rih lo.

Kum 1966 aṭanga London club enkawl tawhtu Wenger hian Gunners-ah kum khat daih bak contract a nei tawh rih lo a, a hma-lam hun tur an inrin siak mek.

Kum 66-a upa Wenger chuan, "England ka enkawl theih lohna tur chhan ka hre lo a, ka la hnar ngai bawk lo. He hmun hi ka in a nih ve tho avangin an chak loh leh chet chhiat pawh hian ka lo lungngai
ṭhin, Mahse, club football-ah hian ka hlimin ka ngaihtuahna ka seng zawk," tiin a sawi.

Sawi chhunzawmin French pachal chuan, "Tunah hian Arsenal-ah kum khat daih contract ka nei mek a, tunhmaa ka lo tih ṭhin tawh angin ka contract hi ka zah a, he ka kalphung hi ka chhunzawm zel bawk ang. A hnulamah erawh eng nge lo thleng tur ka sawi lawk thei bik rih lo," tiin contract thar ziah lam a la sawi ri rih lo.