Juventus tluk duhtu Totti

Francesco Totti chuan season thar thlir lawkin Roma chuan champion lai Juventus tlukin Serie A nomawi chawi thei se tih chu a duhthusam a nih thu a sawi chhuak.

Season hmasa khan Roma hian league-ah point 80 hmuin pathumna an ni a, pakhatna Juventus nen an inthlauhna chu point 11 a ni. Rome khaw fapa rangkachak hian tun hnaia a zawna ṭum nga ngawt champion Juve lak aṭang hian Stadio Olimpico lamah Serie A nomawi lak let a duh a, thla hmasa khan a club tan hian kum khat daih contract thar a ziak.

Kum 39-a upa Totti chuan, "Kum bul kan
ṭan dawn hian thil tum leh ruahmanna kan siam ṭhin a, chu chu a sang thei ang ber thlen a ni. Tun dinhmunah chuan Juve hi a zawna vawi nga champion thei an nih vang leh keini aia hming langsar tam zawkna an nih avangin tluk an harsa hle ang tih a chiang. Mahse, kan inkar zau hi sawr zim tur leh pakhatna nih tuma bei turin kan inbuatsaih a ṭul," a ti.

Roma tana a season 25-na khel tur Totti chuan, "Hetiang a rei club pakhat tana khelh hi chu midangin an ti ve thei kher lo ang. Roma-a hun ka hman chhung khan thil hlimawm leh lungngaihthlak tam tak ka tawng a, kan nomawi chawite kha ṭhenkhat tan a tlem a ni mai thei, mah se ka tan chuan a hluin a tam. Ka season hnuhnung berah hian hlawhtlinna chan leh ngei pawh ka beisei," tiin a sawi bawk.

Italy international hlui hian Roma tan Serie A title pakhat, Coppa Italia title pahnih leh Supercoppa Italiana title pahnih a lo lak pui tawh a, a club tan hian match 601 a khelh aṭangin goal 248 khung tawhin ani aia record nei ṭha an awm lo.