Sharapova tan Rio beiseina a tawp

Damdawi hman phal loh a hmang tih an hmuh chhuah avanga hrem tuar mek Maria Sharapova chuan hrem a nihna ti nep emaw hlip tur emaw a Court of Arbitration for Sport (CAS) hnena a khin letna chu September thla thleng tih khawtlai a ni dawn - Russian star tan Rio Olympic a inlan beisei ngam chi a ni tawh lo ang.

Kum 29-a upa Sharapova hi kumin Janury thlaa khelh Australian Open-ah khan meldonium a hmang tih hmuh chhuah a ni a, he damdawi hi World Anti-Doping Agency's (WADA) chuan kumin January 1 aṭang khan infiammite tana hman phal loh zingah a lo telh tawh avangin Sharapova hi International Tennis Federation (ITF) chuan kum hnih chhung inkhel thei lo turin a hrem mek.

Grand Slam vawi nga champion tawh hian hrem a nihna hi khawvela infiamna lam thubai ngaihtuahtu sang ber CAS hnenah a thlen a, thiam chan theih ngei a inbeisei bakah tennis court-a inlan leh thuai a inbeisei hle. Mahse, tun dinhmunah chuan Russian star beisei angin thil a kaltluang ta rih lo a ni.

Court chuan an thu-chhuahah ti hian an tarlang, "Thubuai khin letna tur finfiahna tur hman rua leh
ṭul dangte thehluhna hun a tan leh thil inbakkaih a awm loh zawk nan thuthulkna chu September 19, 2016 vela tihchhuah turin a ruahmanna a siam," tiin a sawi.