Saina-i'n medal pakhat aia tam beisei

Indian badmintion shuttler zinga Olympic medal dawng thei hmasa ber leh awmchhun ni bawk Saina Nehwal chuan Rio Olympic-ah medal pakhat aia tam an lak theih a beisei thu a sawi.

India hian 2012 London Olympic-ah khan shuttler panga tirin Saina hian bronze medal a dawng. August thla a neih tur Rio Olympic-ah hian shuttler pasarih Saina, P.V. Sindhu, K. Srikanth, Jwala Gutta, Ashwini Ponnappa, Manu Attri leh Sumeeth Reddy te an inlan dawn a - India badminton chanchinah Olympic-a player a tirh hnem ber ṭum a ni ang.

World number 1 hlui Saina chuan, "Tunhma lama ka hneh theih ngai loh Carolina Marin, Wang Yihan, Ratchanok Intanon te ka hneh thei tawh tih ka chiang a, inrintawkna ka nei. Kuminah duh-thusamain khelṭha lo mah ila team anga chhut chuan kan ṭha rual hlein ka hria a, hei vang hian tun hma zawng aia ṭha zawk result kan neih theih ngei ka beisei," a ti.

Kum 26-a upa Saina chuan sawi chhun-zawm-in, "Olympic boruak hi a len ṭhin em avangin Rio Super Series angin ngai ila a hahdam thlak hret maithei. Eng round pawh a awlsam dawn lo a, kan chesual zeuh a nih chuan kan khingpuiten min hrem nghal zel ang," tiin a sawi.