Juve pan duhtu Jackson Martinez

Colombian striker Jackson Martinez chuan Guangzhou Ever-grande-a thla nga chauh hun a hman hnuah China club hi chhuahsana Juventus pan a duh thu a agent Henrique Pompeo chuan a sawi.

Kum 29-a upa striker hian February khan Atletico Madrid aṭangin pound maktaduai 31-in China hi a pan a, a hunlaia Asia khawmualpuia player manto ber niin tunah erawh Europe lama kir a duh leh ta.

Henrique Pompeo chuan, "Tun dinhmunah chuan sawmna mumal tak dawn kan la nei lo a, mah se Europe-a lo kir leh ngei erawh kan duh a ni. Jackson hi Guangzhou Evergrande chungah a lawm em em a, mah se Europe lamin a lung an len leh tawh a ni," a ti.

Martinez-a agent chuan sawi chhunzawmin, "Serie A-a khelh hi Jackson hian a chak tih phat ka tum lo a, Serie A defender-te hmaa a theihna fiah hi a chak a ni. Mahse, tunah chuan engkim hi thu lengvak mai a ni a, thutlukna chiang taka sawi a la awm lo," tiin an dinhmun a sawi fiah.

Season hmasa khan AC Milan chuan Martinez hi lakluh an lo tum tawh a, tunah erawh thawm an nei lo nia sawi a ni. Henrique Pompeo chuan, "Nikum kha chuan Milan hian Jackson an duh ngei a, tuna an la duh leh duh loh erawh ka hre lo. Tun hnaiah Jueventus-in ka player hi an duh anga sawi thawm a awm bawk a, kan phur hle. Juventus hian a hranpa takin min la dawr lo a, nghak phawt ila, engkim a chiang thuai ang," tiin an hmalam hun a chian thuai tur thu a sawi.