Portugal leh Ronaldo hun a inher chhuak
Cristiano Ronaldo-a'n an ram Portugal chu a captain-na hnuaiah European Championship-ah a champion pui a, Real Ma-drid forward hian a football zinkawng hi tihtawp mai la tum lo mah se club leh ram tana a nomawi chawi aṭanga thlirin 'khawvel player manto ber ' pawh lo ni tawh player hi fak bak tih theih a awm lo.
Pathianni zan khan Stade de France-ah Euro 2016 final khelh a ni a, rinkai zawk France dinhmun ṭhatna belhchhah turin Portugal thiampuipa Ronaldo chu inhliam vangin minute 25-naah lakchhuah a ni. Amaherawhchu Fernando Santos-a hoten tlarhnung an rem phui tlat a, tun inelnaa 'draw specialist' tiha an sawi Portugal-in goal an chhuah lo a, extra time minute 109-naa substitute Eder-a goal hmangin 1-0 in hnehna an chang.
Portugal hian an ram history-a a vawi khat nan inelna lianah nomawi an chawi a, European Championship-a match 35 an khelhnaah nomawi hi an chawi ve chauh. Europe inelna sang bera champion thei ram 10-na an ni a, Portugal hi inelna vawi khata vawi thum lai extra time khel chunga nomawi chawi thei hmasa ber an ni.
Pepe hoin
France manager Didier Deschamps-a'n Iceland leh Germany an hneh ṭuma starting eleven tho rawn hmangin Portugal boss Santos-a'n player pahnih a thlak thung. Inhliam vanga Germany hmachhawn thei lo Pepe leh 2015 UEFA U21 C'ship best player William Carvalho te chuan final-ah inkhel bul an ṭan a, team pahnihin hrem lai leh inhliam an neih loh avangin an ṭhat theih dan berin an inremah a ngaih theih.
Ronaldo mittui
Goal venhim tum Portugal-in chance an nei hmasa zawk a, Southampton right back Cedric Soares-a ball vawrh chu Nani-a'n box chhungah a awmin la thla mah se a volley fuh tawk loh avangin goal chung daihah a thlawk a. France lamin Portugal nawr letin Blaise Matuidi ball tauh chu Antoine Griezmann-a'n um lutin a ke veilamin goal zawnah a pet thei lo.
Minute 7-na lekah Dimitri Payet-a'n Ronaldo ball laksak a tumna lamah a khup a sut sak a, referee-in foul pe lo mah se Real Madrid forward mittui a tlak avangin thil awm dan a chiang. Portugal captain hian hliam vangin final-ah tih theih a nei tam tawh lo tih a hriat a, ram tan tiin khel lui leh ngial mah se ngai a awh theih loh avangin minute 25-naah zawn chhuah a ni.
Ronaldo hliam an buaipui laiin vei lam aṭanga ball vawrh luh chu Griezmann-a'n goal kilah a tauh a, Atletico forward ball tauh a nat tawk loh avangin Rui Patricio-a'n a nem chhuak hman. France tan Moussa Sissoko a nung ṭha a, minute 29-naah Newcastle midfielder hian field chanve
aṭangin Portugal lamah khalh pheiin a ball pet kawh zet chu goal chungah a kal.
Minute 33-naah Olivier Giroud, Griez-mann leh Payet te thawhrah chu Sissoko-a'n sengin, French midfielder hian Adrien Silva a vir khum hnuah ṭha takin a pet a, keeper Patricio chu Portugal chhanhimtu a ni.
Vanduai zan
Inelna bul ṭan ṭha Payet-a'n beisei a phak tawk loh vangin minute 58-naah West Ham midfielder aiah Kinsley Coman a rawn inlan a, Euro 2016-a tlan chak ber hian France goal nawr a ti na sawt. Bayern Munich winger Coman-a ball pass chu Griezmann-a'n Portugal keeper Patricio tana dan harsa tur khawpin a pet lo.
Minute 66-naah France winger Coman-a'n vei lam kila Saints wing back Cedric Soares a chaih hnuah ball ṭha a vawrh lut a, changtu nei lo Griezmann-a'n goal zawnah a tauh lo. Atletico Madrid forward hi a theihna aṭanga chhutin a vanduai ṭum tih a chiang hle. Substitute Coman bawk pawimawh chhunzawmin minute 74-naa a ball pass fing tak chu Giroud-a tan goal khung theihna tur ni mah se Patricio-a'n hming ṭhat nan a lo hmang thung.
Portugal-in goal nawr ti na turin striker Eder an luhtir a, Nani leh Quaresma te an thiamna hmun field sir lamah an duh angin an chet theih phah bawk. Manchester United winger hlui cross chu kal sualin goal-ah a thlawk a, Hugo Lloris-a'n a hna neih hmasak ber chu a beng chhuak a, Quaresma bicycle kick chu Spurs keeper Lloris hian a dang leh bawk. Portugal hian minute 80-naah goal zawnah an pet ve chauh a, Euro final-a goal zawna pet tura hun mamawh tam ber an ni.
Team nung zawk erawh France an la ni zel a, Coman-a pass naran tak chu Sissoko-a'n goal-ah kawh taka petin Patricio-a'n a dang ṭha leh pek hle. Giroud vanneih zan a ni lo a, Arsenal forward aia lut André-Pierre Gignac-a'n injury time-ah Portugal innghahna Pepe chiang zetin box chhungah bum mah se keeper chauh a hmachhawn hnuah goal ban a pet per. France an vanduai a, minute 90 chhungin goal a lut lo.
Chhandamtu Eder
Extra time hun chanve hmalam tawp hma hretin Quaresma corner pet chu Eder-a'n a palenna (6 ft 3 in) hmang ṭangkaiin goal-ah tauh a, Lloris zawnah a kal avangin net a ti puar pha lo.
Referee Mark Clattenburg-a thutlukna siam sualin nghawng a nei a, Eder-a handball vangin Koscielny-a'n freekick leh yellow card a chawi a, Borussia Dortmund lak thar Raphael Guerreiro-a freekick pet chuan crossbar a per a, France an him hram.
Minute 109-naah France fimkhur loh zarah Portugal-in an vaw let; William Carvalho, Quaresma leh Moutinho ten ball an inpek kual hnuah Eder-a'n ball a chang a, substitute striker hian vanduai taka yellow card hmu tawh Koscielny chu tharum hmanga nek sawnin chiang zetin box pawn aṭangin a pet lut. Lille striker kum 28-a upa hian ram tan vawi 29 a khelhah goal li a khungna chiah a ni a, Portugal champion-na goal hi competitive match-a a pet goal vawi khatna a ni.
Didier Deschamps-a'n France chhanhim turin Anthony Martial luhtir zui mah se Manchester United fachuam pawhin inelna thlengtu hi a chhanhim zo lo a, field sira coach ang maia khawsa Ronaldo chu hun tawp lama langsar ber a ni.
Tute nge khel?
Portugal (4-1-3-2) : Patricio; Cedric, Pepe, Fonte, Guerreiro; W. Carvalho; Sanches (Eder 78'), Silva (Moutinho 60'), Joao Mario; Nani, Ronaldo (Quaresma 25')
Bench-a ṭhu tluante : Lopes, Alves, R. Carvalho, Vieirinha, Andre Gomes, Rafa, Eliseu, Eduardo, Danilo
France (4-2-3-1) : Lloris; Sagna, Koscielny, Umtiti, Evra; Pogba, Matuidi; Sissoko (Martial 110'), Griezmann, Payet (Coman 58'), Giroud (Gignac 78')
Bench-a ṭhu tluante : Mandanda, Jallet, Rami, Kante, Cabaye, Schneiderlin, Mangala, Digne, Costil
Match Statistics
Portugal France
1st 2nd ET FT 1st 2nd ET FT
4 2 3 9 Attempts total 7 10 1 18
0 1 2 3 Attempts on target 3 4 0 7
3 4 0 7 Saves 0 2 1 3
2 1 2 5 Corners 3 3 3 9
0 0 1 1 Offsides 0 1 1 2
2 7 3 12 Foul neih zat 2 4 7 13
2 4 6 12 Foul tuar zat 2 7 3 12
45% 48% 48% 47% Possession 55% 52% 52% 53%