Ronaldo tan kan chak - Pepe

Euro 2016 final man of the match-a thlan Pepe chuan, "Kan player pawimawh ber kan chan avangin a harsa sawt a, ani hi chu engtik hunah pawh goal khung thei a nih avangin kan mamawh a ni. Ronaldo tan kan chak thei tih kan hria a, hun harsa tak paltlangin kan huaisen rah sengin hnehna kan chang," tiin an captain Cristiano Ronaldo tan theihtawp an chhuah thu a sawi.

Portugal player pawimawh Pepe leh Ronaldo hian UEFA Champions League-ah Real Madrid an lo champion pui tawh a, kum khat chhunga UCL leh Euro nomawi chawi kawp thei hi an tam lo hle. Fernando Torres leh Juan Mata ten kum 2012 khan Spain leh Chelsea an lo champion pui tawh a, kum 1988-ah Hans van Breukelen, Ronald Koeman, Berry van Aerle leh Gerald Vanenburg ten PSV leh Netherlands nomawi chawi puiin kum 1964 khan Luis Suarez-a'n Internazionale leh Spain te a champion pui bawk.

Ronaldo a lawm

Kum 12 liam ta khan Portu-gal-in an ramah European Cham-pionship an thleng a, final-ah Greece hmachhawnin champion tura ngaih ni mah se Lisbon-ah an chak lo. Kum 19-a upa Ronaldo chu hnem theih a ni lo a, champion duh luat vangin Portuguese forward mittui a tla fo. Stade de France-ah inhliam vangin Ronaldo mittui a tla a, hun tawpah tla nawn lehin a tlak dan a dang tawh - Real Madrid forward hi a lawm avangin a biangah mittui a luang.

Kum 31-a upa Ronaldo hian ram tan match 133 khelin goal 61 a khung a, World Player of the Year ṭum thum a nih tawh bakah Champions League nomawi vawi thum a chawi tawh bawk.

Footballer ropui Ronaldo chuan, "Kum 2004 aṭangin hetiang hun hi ka la nghak char char a, kan phu nia ka hriat avangin Pathian hnenah pawh ka dil ṭhin. Vanduai thlak takin inhliam mah ila kan player neih dan te, game plan leh kan thawhona ṭha tak hmangin France kan hneh thei tih ka hria. Portugal tana nomawi chawi ngei hi ka duh a, tun hi ka hun tawn zinga ka hlim ber ṭumte zinga mi a ni," tiin a lawm thu a sawi.

Portugal hero

Eder hi Swansea City-in pound maktaduai 5-in June 28, 2015 khan S.C. Braga aṭangin an lalut a, goal vawi khat mah a khung loh avangin kumin January thla khan Lille-ah loan-in a kal a, Ligue 1-ah erawh goal ruk a khung.

Portugal hero Eder chuan, "Cristiano khan chakna goal ka khung tur thu min hrilh. Amah khan chakna leh phur taka khelh theihna min pe a, amah leh Portuguese mipui tan kan champion a ni," tiin a sawi.

Khawvel barakhaihtu

Portugal hi inelna ṭan hmain pawisa thapna lama an odds dan zat chu 20/1 a ni a, Leicester City champion ṭum ang em emin (odds = 5000/1) khawvel barakhaih lo mah se rinkai ber an ni lo tih chu a chiang.

Portugal hian knockout stage lut turin Iceland (1-1), Austria (0-0) leh Hungary (3-3) te an hmachhawn a, vawi khatmah an chak lo. Last 16-ah Croatia chu extra time-a Ricardo Quaresma goal hmangin an hneh hram a, quarterfinal-ah Poland chu 1-1 a an draw hnuah penalty hmangin an hneh hram. Fernando Santos hoten semifinal-ah Wales 2-0 in an hneh a, hei hi tun inelnaa match sarih an khelha minute 90 chhunga an chak awmchhun a ni.

Portugal boss Fernando Santos chuan, "Cristiano Ronal-do player danglam bik leh entawntlak a ni. Final-ah khan khel thei lo mah se dressing room-ah pawh a ṭhiante a fuih a, team anga thawhho pawimawh zia a chet ze hmangin a lantir. Kan team hian hmabak êng tak kan nei a ni," tiin Ronaldo a fak.