Hun ṭha kan bawhpelh - Deschamps

France-in kum 1984 khan European Championship thlengin Michel Platini hoin an champion a, Euro 2000-ah Zinedine Zidane hoin an champion leh a, an ram ngeiah a vawi thum nan champion leh thei mah se Portugal lakah Didier Deschamps hote'n hun ṭha an bawhpelh.

An champion hnuhnun ber ṭuma captain Deschamps chuan, "Kan chau deuh a nih pawhin chhuanlam tur kan nei lo. Team pahnih kha kan intluk tawk em em a, hun tawpa result erawh kan tan lungngaihna a ni," tiin a sawi.

Inelna thlengtu France hian an khingpui Portugal aiin darkar 24-in semifinal an khel tlai a, chawlhna hun nei tlem zawk mah se Deschamps-a'n chhuanlam a siam lo.

Inkhel chungchang sawiin Des-champs chuan, "Goal khung theihna hun ṭha chu kan nei a ni. Kan chance neih hnuhnung ber chu Gignac-a'n a hmang ṭangkai lo. Portugal pawhin goal khung theihna tur chance an insiam a, vanduaithlak takin anni chuan an khung a ni. European champion nih theihna hun ṭha bik chu kan bawhpelh a ni," a ti. France hi final khelh hmain team ṭha zawka ngaih an ni a, an rama khelh a nih bakah Portugal player pawimawh ber Cristiano Ronaldo chu inhliam vangin minute 25 lekah lakchhuah a ni.

Kum 47-a upa Deschamps chuan, "Ka hmalam hun ngaihtuah nghal vut vut ka tum lo, hun harsa tak kan paltlang hi pai dam ve phawt a ngai. Ka player-te hi kum lama naupang tak tak an ni a, kan phu ang hlawhtlinna chang pha lo mah ila tuna kan tawpna tur a ni lo. France hian hmabak êng tak a nei a ni," tiin a hmalam hun uluk taka ngaihtuah a ṭul thu a sawi.