India an chak, semi-final an lut

ICC World Cup 2015-ah South Africa hnung zuiin India-in semi-final an lut ve leh. Nimin khan quarter final-ah Bangladesh chu run 109 in an sawp a, an champion nomawi hum turin hma lam an pan zel.

Melbourne Cricket Ground, Melbourne-a inkhelah hian India tan Rohit Sharma a che ṭha a, kum 27-a upa Nagpur tlangval hian India tan century a hlap chhuak.

India chakna

Nagpur khaw chhuak

Ṭhumvawra vannei zawk India in bat hmasak an thlang a, an thlang sual lo. Inkhel ṭan tir lamah hma takin India beiseina Shikhar Dhawan leh Virat Kohli te out mah se a hun takah Rohit Sharma a che ṭha a, ball 126 a hmachhawnah run 137 a vaw chhuak.

Rohit Sharma hi Suresh Raina chuan a thlawp ṭha bawk a, ball 57 a hmachhawnah run 65 vaw chhuakin an pahnih inkawp hian dinhmun duhawm takah India an hlangkai. Over 50 a ral meuh chuan India in run 302 an hlap chhuak a, mi paruk an hloh.

Bangladesh tan India laka run 302 um hi thil hautak a ni. Over 45 an khel thleng hman tihin run 193 an vaw chhuak a, an vaiin an out vek. Bangladesh tan a run siam hnem ber Nasir Hossain chuan ball 34 a hmachhawnah run 35 a vaw chhuak thei hram. Bowling lamah India tan Rohit Sharma te khua Nagpur khaw chhuak tho Umesh Yadav a che ṭha a, run 31 chiah pe in wicket li a la thei a ni.

Inkhel chhehvel

India hian tukin zinga Australia leh Pakistan in tum a chak zawk zawk chu March 26 hian Sydney-ah semi final-ah an tum ang. India tan tuna an chakna hi World Cup match 11 chhung a zawna an chakna a ni ta a, kumin World Cup match sarih an khelh tawhah an la chak fai vek.

Wicket hnih latu India fast-bowler Mohammad Shami hian World Cup khelh mekah wicket 17 la tawhin ani aia wicket la hnem an la awm rih lo.

India captain MS Dhoni tan captain ni chunga ODI match 100 a chakna chiah a ni a, ani aia captain ni chunga chak result hlawh chhuak hnem awmchhun chu Australia captain hlui pahnih, vawi 165 chak thei Ricky Ponting leh vawi 107 chak thei Allan Border te chiah an ni.

Rohit-a thukhawchang

Man of the Match-a thlan Rohit Sharma chuan, "Opening batsman khelh ṭhat leh ṭhat loh hian inkhel a hril thui em em a, ka khelh ṭhat avangin ka lawm hle a ni.

Team pumpui thlir in kan khel ṭha a, kan match khelh tawh en chuan bowler te'n wicket an la mawlh mawlh a, batsman te'n run kan score reng bawk a, tuna kan khelh dan ang hi kan chhawm nun reng a pawimawh a ni. Game hnih chiah champion turin kan hmabak tawh a, kan game hmabakah hian tuna kan khelh dan anga kan khelh chuan kan champion thei a ni," a ti.