Zarkawt Serpents tan phuba lakna hun ṭha

Samsung 3:16 Plan Solution Mizoram Super League-ah chak hmel la hmu lo pahnih Zarkawt Serpents leh Chaltlang Ryders Thawhlehni zan khan an inkhel a, chak zawkah Chaltlang Ryders an ṭang. Vawiin tlaiah an in tum leh dawn. Zarkawt Serpents tan tun hi phuba lakna hun ṭha a ni.

Zarkawt Serpents hi an chak zo lo leh a nih ngat chuan an tan thawh chhuah leh a har tawh ang. Match nga chhung hneh nei lo an nih tawh avangin an player te'n chak ngei tumin an khel dawn a, an rilru huaisen tawk leh tawk loh vawiin tlaiah a hriat dawn.

Chaltlang Ryders hi an phur vanglai tak a ni. Match li chhung hneh nei lo a an kal tawh hnu in thawhlehni zan khan a vawikhat nan chak hmel an hmu a, hei hi an phur phah khawp ang. Thawhlehni zana an team hneh hi vawiin tlaia an tum tur Zarkawt Serpents tho an ni a, 70-63 a an lo hneh tawh avangin an hlau lo ang.

Eng nge an sawi?

Chaltlang Ryders Asst. Coach Marc Lalthlamuana Sailo chuan, "Kan hneh tawh hnu an nih vang ringawtin kan zuam dawn lo a, inthlahdah thei kan ni lo. Rei tak chak loh hnua chak zo hlim kan nih avangin player-te pawh an phur tlang a, chak ngei beiseiin kan khel ang. Tlangnuam tlangval David Lalrinchhana kan chhawr leh thei tawh dawn a, a ni hi kan ṭangkaipui ang," a ti.

Zarkawt Serpenst President PB Lal­siamliana chuan, "Kan game plan angin kan la khel fuh thei lo a ni ber a, vawiin tlai kan game tur hi insiamṭhat nan hman kan tum ang. Kan game hmasaah khan kan hneh lo ngei mai a, kan players zingah inhliam kan neih nual vang a ni. Vawiin tlaiah erawh a ṭha thei ang berin khelh kan tum ang a, kan game hmasa a inhliam vanga khel ṭha thei lo Lalrinzuala Hnamte hi kan tan a ṭangkai ang," tiin chak ngei an tum tur thu a sawi.