Vawiinah MCL 3rd Edition FINAL Chanmarians vs Ramhlun Venglai

Mizorama cricket inelna ngaihhlut berte zinga mi Mapuia Cricket League (MCL) 2015 chu vawiin hian Chanmarians Cricket Club leh Ramhlun Venglai Cricket Club-te'n an khel dawn.

Chanmarians CC hi tun season-a 1st division club hlawh­tling ber tih ngam an ni a, 1st division inelnaa champion lai an nih bakah season hmasa MCL-a finalist an ni bawk.

An hmaa ding tur RVL hi tun season-a 2nd division-a pahnihna an ni a, season tharah chuan 1st division club an ni tawh dawna an phur vanglai tak an hmang mek. MCL hmasaberah khan final-ah an lo vanduai tawh a, tun hi MCL vawi thum neih tawha final an luh vawi hnihna a ni tawh. Tun ṭum final-a inhmachhawn tur team Chanmarians leh RVL-te hi MCL-a la champion ngai lo ve ve an ni a, final an vawi hnih luhna ve ve a ni bawk.

Chanmarians kalkawng

Final an luhna kawngah Chan­marians hian harsatna lian tham an tawk meuh lo a, league-ah match nga an khela hetah hian ruahsurin inkhel a tihbuai vanga no result vawi khat an neih bak chu an khingpuite an hneh fai vek. Hei hian anmahniah inrintawkna nasa tak a pe a, final lut tura league-a a sang pahnih inelna Qualifier 1-ah pawh RVL hi harsatna lian lutuk tawk loin an hneh bawka an kalkawng a tluang chho hle.

Tun season-a an innghahna ber chu an top order batsman-te leh an slow bowler-te an ni. MCL final an luh chhohna kawngah an opening batsman pahnih Michael Lalremkima leh Abhay Joshi-te'n an khel ṭha tluang hle a, Michael-a hian match ngaah run 198 a siam tawh a, inning khata a run siam hnem ber chu run 61 a ni a, tun tournament chhungin half century vawi hnih a siam tawh.

Bowler lamah chuan slow bowler tawnhriat ngah Raju Chhetri-a an hmang ṭangkai hle. Raju-a hian match rukah wicket 11 la tawhin ball 144 a vawmah run 101 chiah a pe thung. Chanmarians batsmen zingah Abhay Joshi pawhin a khel ṭha tluang a, tournament chhungin run 155 siam tawhin a run siam hnem ber ṭumin run 66 a vaw chhuak bawk.

League-a an match hmasa berah RVL nen inhmachhawn tur an ni a, ruahsurin a tihbuai avangin an inhmachhawn thei loa point khat ve ve an insem. An match hnihnaah Chaltlang SC nen inhmachhawnin wicket 5-in an chak a, Zarkawt Lords wicket 9-in an hneh leh a, Zemabawk Pitchers run 34-a hneh lehin an league match hnuhnung berah Armed Veng wicket 8-in an hneh. Qualifier 1-ah RVL nen inhmachhawnin wicket 8-in an chaka final an lut.

RVL kalkawng

RVL hian final-a an kalkawng hi a sualin an sual chhuak thung. League-ah match ruk khelhah point sarih an hlawh chhuak. Vawi nga khelhah vawikhat no result an nei a, vawi thum chakin vawi khat chak loh an nei. Match harsa tak tak hmachhawn chhoa final lut an nih avangin an hriam hle tawh tura ngaih a ni a, mahse Qualifier 1-a Chanmarians nena an inkhel result thlir chuan an fimkhur hle a ngai thung ang.

Tun season-ah 1st division ni lo mah se Mizorama team hlun ber pawl an nihna leh player ṭha tak tak an kawl avangin dah hniam ngawt theih an ni lo a, 1st division team ṭhaa ngaih Armed Veng pawh hneh thei an ni. An top order batsman-te chungah an innghat nasa hle a, team anga an chet ṭhat leh chet chhiat pawh an batsman-te koah a innghat thui hle.

MCL-a an batsman khel ṭha tluang ber leh innghahna chu K Vanlalruata a ni. Ruata hian match nga khelh tawhah run 141 a vaw chhuak tawh a, innings khata a run siam hnem ber chu run 75 a ni a, tun tournament chhungin half century vawikhat a siam tawh. An bowler lama che ṭha chu Robert Lalfamkima a ni a, match nga khelh tawhah wicket riat a la tawh thung.

Final nghahhlelhawm

Chanmarians leh RVL-te hi tun season-ah vawi hnih an inhmachhawn tawh a, Chanma­rians an la chak ve ve. MCL-ah hian vawi hnih inkhel tawh tur an nih laiin ruahsur vangin vawikhat chiah an la inhmachhawn.

MCL Qualifier 1-a an inhma­chhawn ṭumin Chanma­rians-in hma takah RVL opening batsman Ruata an vawm out a, heta ṭang hian a tawp thlengin RVL hi an tho chhuak hleithei lo a, over 20-ah run 102 siamin wicket riat an hloh. Chanmarians-in chak nan over 20-ah run 103 an mamawh chu over 15.2 chhungin an umpha a, an opening batsman Michael Lalremkima chuan run 50 a vaw chhuak.

Final-a an inhmachhawn tur hi RVL opening batsman Ruata leh Chanmarians batsman Michael-a te inelna angah pawh a ngaih theih. Qualifier-a an inhmachhawn ṭumin Ruata'n a khelh ṭhat tawk loh laiin Michael-a'n a khel ṭhaa Chanmarians an chak. Final-ah hian an player pawimawhte khelh ṭhat leh khelh chhiat inkar a zau hle dawn a, an teammate-te khelh ṭhat leh khelh chhiatah pawh thui tak a innghat ang.