Barca ral a lian, English an ral

Nou Camp-ah English goalkeeper Joe Hart a che

ṭha a, Manchester City goal a lut tur vawi 10 zet dang mah se la, minute 31-na a Ivan Rakitic pet erawh a dang thei lo.

Nilaini zan khan kumin Champions League a English club beiseina chu a tawp chiang ta. Barcelona chuan 1-0 in Manchester City an hneh a, inkhel hmasa nen belhkhawm in Barca hi 3-1 a chak in quarter final an lut.

City ngam loh Barca

Champions League last 16 first leg Etihad stadium-ah Lius Suarez a goal hnih hmangin Barca in Manchester City 2-1 an hneh tawh a, second leg-ah pawh phuba an la thei ta chuang lo a ni.

Nikum khan quarter final lut turin Barca hian English champion hi 4-1 in an lo sawp tawh bawk. Tun hnai vawi li an inkhelhah Barca chak fai vek in Spanish Club lakah English Club an zawr ṭhin hle. Manuel Pellegrini-a'n City a enkawl hnuah Barcelona ṭum li an hmachhan tawh a, chak hmel a team te a la hmuhpui lo.

Goal a lut tlem

City tan chak tur in goal hnih tal khung a ngai tawh, inkhel ṭan aṭangin goal khung tumin an bei nghal. Tlar hmaah Sergio Aguero a mal tlat a, a hnungah ball thiam leh fing David Silva leh tharumngah Yaya Toure an awm.

Amaherawhchu goal hlauhawm nei hmasa zawk chu Barca an ni thung. Brazilian Neymar chuan ṭan aṭanga minute ngana lekah goal ban a pet per nghal dawp. Hemi hnu hian Silva leh Aguero te inkawp chuan Barca tlar hnung an chhaih buai zui ve nghal.

Minute 30 chhung an innawr tawn zak zak hnuah Lionel Messi chuan Rakitic-a tan ball duhthusam a pe a, Croatian midfielder hian Barca goal hmahruai a khung. 1-0 in chawlhlawk an hmang.

Second half-ah City tan si phurh belh huam a nawr a ṭul tawh. Inkhel an ṭan leh chiah a, Andres Iniesta leh Rakitic ten hun ṭha an hmu leh, mahse City goalkeeper Hart an su tlang zo lo.

Minute 77-ah Gerard Pique foul vangin City in penalty an hlawhchhuak, a pet turin striker Aguero a rawn ding chhuak. Mahse City beiseina hi Barca goalkeeper Ter Stegen-a'n a lo dan sak.

Hun tawp hma minute 15 chhung hian Braca tlar hma pathum Neymar, Messi leh Suarez ten vawi duai lo City tlat hnung an su tlang thei a, mahse a tawp ber a ding Hart an sutlang zo lo vek. Manchester City tlar hma te'n Barcelona tlar hnung an chhaih buai pha meuh lo thung.

Eng nge an sawi?

Barca boss Luis Enrique chuan, "Zaninah khan Barcelona tak tak kan hmu, goal thun tumin kan bei nasa a kan khung ngei bawk. Kan khung tam thei lo erawh a pawi ka ti, kan tlar hma te chet ṭhat tawk loh vang a ni lo a, City goalkeeper Joe Hart kha a khelh ṭhat em vang zawk a ni. Ka naute khelh danah ka lawm a, ti kha chuan kar tawp a El Clasico kan khelh turah inrin tawkna nasa tak nen kan khel thei ang," a ti.

Enrique chuan sawi chhun zawmin, "Messi-a'n goal a khung lo kha thil mak a ni zawk. Mahse, zaninah khan a khel ṭha tak zet. Ani hi chu player ṭha chungchuang a ni a, ani ang hi an la piang lo a, an piang leh tawh pawhin a rinawm loh zawk hial." tiin a player duhlai chu a fak hle.

City boss Pellegrini chuan, "Keini aia team ṭha zawk an ni tih chu phat buai vak ngai lo in a lang chiang hle. Kan chak lo hi kan pawm thiam tur a ni. Penalty kha khung ila chuan thil ala danglam thei mahna. Mahse, kan vanneih ni a ni lo a kan hun ṭha ber pawh kan chhawr ṭangkai thei si lo. Hei erawh kan hriatreng a ṭha ang - kumin hi kan tawp hlenna tur a ni dawn lo," tiin a sawi.

Barca goal khung tur vawitamtak dang tu Hart chuan, "First leg-ah khan Messi penalty ka dan avang khan inrintawkna sang tak nen inkhel bul ka ṭan thei. Mahse zanin kha chu a mangan thlak duh khawp mai, ka theihtawp chu ka chhuah. Mah se ka dang seng ngang lo a ni," tiin a sawi bawk.