Parma chairman an man

Serie A club Parma chairman thar leh neitu ni bawk Giampietro Manenti chu credit card chingpen thubuai vanga man a ni.

Italy-a dan lama thu­neitu tarlan danin Manenti hi credit card dik loh hman vanga man 22 zingah a tel a, he buainaa pawisa che vel hi pound maktaduai 3.24 anga ngaih a ni.

Manenti hian thla hmasa khan Parma neitu nihna leh chairman hna a chelh ṭan a, club leiba hi pound maktaduai 72.4 a ngaih a ni. Parma hi Serie A table mawngphahah an awm mek a, player-te hlawh pek theih loh vangin point thum paihsak an ni tawh.

Parma hian an khel chhunzawm thei lo a nih chuan an inkhelh tawhna result zawng zawng kha a ngaiin a kal ang a, an khelh hmabak erawh 3-0 vekin an chak lo thung ang.

Captain Alessandro Lucarelli chuan, "Kan buaina hi hreawm kan ti a, a tawp vat hi kan beisei tak meuh meuh a ni," tiin leiba vanga an buaina chu tawp thuai se a ti hle.