Bale-a'n a theihna lantir a mamawh tawh lo - Coleman

Wales manager Chris Coleman chuan Gareth Bale-a'n Real Madrid-a an sawiselna a dawl zawh tur thu a sawi a, Wales tan a theihna lantir kher a mamawh tawh lo a ti bawk.

Coleman chuan, "Bale hi a thiam em em a, a ṭhat zia ti chiang turin Wales tan a theihna lantir a mamawh tawh lo. Madrid tan chuan field chhunga a luh apiangin a ṭha tih lantir a ngai a ngai a, Wales leh Madrid hi khaikhin tur a ni lo," tiin Wales team-a Bale-a'n hmun a chan chian thu a sawi.

Fulham boss hlui chuan sawi chhun­zawmin, "Bale hian Wales tan chuan a tih ṭhin ang kha a tih chhunzawm zel chuan a tawk. Real Madrid-ah chuan chak bakah game mawi khelh a ngai a, kan team-ah chuan chak a tawk. Gareth hi mi tam takin a khel ṭha tawk lo ti mah se Champions League quarterfinal an thleng a, La Liga champion thei turin an dinhmun a ṭha a, goal 16 a khung tawh bawk a, a khel ṭha tawk a ni. Amah hian buaina tur ka nei lo," tiin a player a fak.

Wales hian March 28 khian Euro 2016 qualifier-ah Israel an hmachhawn ang.