Germany-ah Juve an chungnung

Carlos Tevez-a'n goal hnih a khung bakah Alvaro Morata goal khung tur a siam sak a, Juventus-in Germany-ah Boru­ssia Dortmund 3-0 in an hneh.

Italian champion hian Dort­mund hi an khelmual Juven­tus Stadium-ah 2-1 a an hneh tawh avangin aggregate-ah 5-1 a chakin UEFA Champions League quarterfinal an lut.

Nilaini zan inkhelah Juve manager Massimiliano Alleg­ri-a'n 4-3-1-2 formation a hmang a, Tevez leh Morata te hnungah Roberto Pereyra a awm. Tawnhriat nei ṭha Andrea Pirlo, Martin Caceres, Kwadwo Asamoah leh Romulo te inliam vanga an chhawr theih loh avangin Claudio Marchisio pawhin goal venhim aiah ball sem hna a thawk.

Dortmund manager Jurgen Klopp-a'n forward Ciro Immobile chu a club hlui hmachhawn tur zingah a telh lo a, bench-ah ṭhut tir. Tlar hmaah Pierre-Emerick Aubameyang a awm a, a hnungah Marco Reus, Kevin Kampl leh Henrikh Mkhitaryan te an awm a, goal khung an tum tih a chiang.

Signal Iduna Park-ah Juven­tus-in bul an ṭan ṭha a, minute thumna lekah Carlos Tevez chuan metre 25-na aṭangin kawh zetin a pet lut a, Dortmund keeper Roman Weidenfeller-a'n tih theih a nei lo. Defender Stephan Lichtsteiner-a'n Argentine forward pet ang bawkin a pet zui a, Weidenfeller-a'n a ti bei dawng thung.

Minute 27-na lekah inhliam vangin Paul Pogba lakchhuah a ngai a, a aiah Andrea Barzagli dah luh a ni. Dortmund-in goal khung tumin an nawr let a, Juve tlar hnung buai deuh mah se an chance neih ṭhat berah Aubameyang-a'n goal zawnah a pet lo.

Second half-ah Dortmund game a nung chhunzawm, goal khung an tumna lamah Juventus-in chance an nei a; keeper Weidenfeller-a'n Juve forward Morata, Tevez leh Pereyra te goal khung tur a dan sak.

Minute 63-naah Italian keeper Gianluigi Buffon chu a vawi khatna atan fiahin a awm , Kampl ball pet chu Buffon-a'n a dan sak a; defender Neven Subotic ball petin Juve player a per hnuah goal sirah chiah chiahah a kal.

Minute 71-naah Morata-a'n awlsam takin Juve goal hnih­na a khung a, Marchisio leh Tevez te thawhrah a ni. Minute riat hnuah Tevez-a'n a goal hnihna a khung a, mak ang reng tak chu Argentine forward tan Champions League-a goal thum a inrawlh vek vawi khatna a ni.

Carlos Tevez hian tun season-ah Europe-ah goal ruk a khung tawh a, kum 2006-a David Trezeguet hnua Juve tan Europe a goal ruk khung leh thei hmasa ber a ni.

Dortmund-in goal an khung ve thei lo a, Germany-a goal thum khung thei Juventus aggregate-ah 5-1 in an chak.

Dortmund coach Jurgen Klopp chuan, "Goal-ah kan pet tam tawk lo a, Juventus tan harsatna kan siam lo. Minute tin khan Juventus-in inrintawkna an nei a, a tawpah chuan chan kan nei ve lo. Juve kha an ṭha zawk a, minute thum leka goal an khung kha an vanneih pui a ni," tiin a sawi.

Juventus coach Massimi­liano Allegri chuan, "Match hnih ṭha taka kan khelh hnua quarterfinal lut kan nih avangin kan khelh danah kan lungawi hle a ni. Kan tih tur kan chiang tlang a, chak phu zawk kan ni. Hma lam kan thlir a ṭul a, kan thlen chinah hian kan duhtawk mai tur a ni lo," tiin a sawi.