Zaninah intawn vawi hnihna Khatla TBL vs Zarkawt BCA

Samsung 3:16 Plan Solution Mizoram Super Lea­gue-ah Khatla TBL-in club dang panga an hneh vek a, a sang berah an awm mah se an fal lo. An hnuai chiaha awm Zarkawt BCA-in TBL an rum ṭhaih pha a, zanin dar 8:00 hian Hawla Indoor Stadium-ah a ṭum hnihna atan team pahnihte hi an inhmachhawn dawn.

Mipui tam zan

March 10 zan khan Khatla TBL-in hmahruaitu nih in chuhna inkhelah Zarkawt BCA 64-61 in an hneh a, zanina an inkhel tur pawh hi hmahruaitu inchuhna inkhel tho a ni.

An intawn hmasak ṭum khan mipui an tam a, ṭhut­na chang loa court chhunga ding pawh an tam - MSL a inkhel entu tam ber ṭum a ni. Mizoram basketball tana a lawmawm lai chu mipuiin inkhel hmuhnawm an thlir a, final whistle rik hnuah chauh a chak zawk tur a chiang. Inkhel en man Rs 30 a ni a, a let hlawk pawhin en man a tam a nih pawhin a hmaa TBL leh BCA inkhel kher chu Hawla Indooor Stadium leng lo an pung khawm tho ang.

Zaninah mipui an tam leh dawn a, ṭan lam nei aṭanga neutral supporter thlengin an in pel sua sua dawn. Mipuiin awmze neia thawm an neih a hun ta; Khatla TBL-in vengchhung mipui bakah veng pawn aṭangin ṭantu an ngah a, an auh danah hmasawn zel an mamawh - 'Au Hla' ṭha tak tak an neih a hun ta. Khatla hmasawnna tur Zarkawt BCA mamawh tho a ni a, an inkhelh hmasak zawk ṭumin home team an ni a, ṭantu ngah zawk mah se an tam ngaihtuahin an thawm a ring tlat lo.

Thlir letna

BCA shooting guard Henry Lalramngaih­awma'n second tlemte chauh a awm tawhin three points score a tum a, a hlah avangin TBL an chak. Inkhel aṭanga lang chiang deuh chu BCA kha chak zo lo mah se an tlawm lo, Khatla hneh hmasak bertu nih hi an châk chu a ni.

Inkhela langar chu H. Laldinsanga a ni a, Saron Veng tlangval Mapuia hi TBL coach a ni. TBL-in an game plan-ah mimal thiamna an dah pawimawh a, an chet chhiat apiangin Mapuia a lut a, game plan ho lam tak a ni nachungin rah ṭha a nei zel. BCA-in Mapuia an dan thei loh avangin table-ah pahnihnaah an awm phah.

Thlir lawkna

Khatla TBL captain Vanlalnunsanga'n inchhuang thei bik an ni lo tih a chiang. Vanglaini palai hrilhin Lana chuan, "Kan vanneih vang chauh a, chak vek thei kan ni. BCA hneh turin kan fight viau a ngai dawn a, chak leh chak loh chu vanneih leh vanduai inkar a ni," a ti.

TBL captain chuan sawi zelin, "Dinhmun sang zawk thleng tur chuan mimala kan khelh a thiang lo. Team angin kan khel ang a, kan chak theih ngei pawh ka ring," tiin a sawi.

BCA nena an inkhelh hmasak zawk ṭum khan TBL player-te an khel ṭha a, amaherawhchu mimalin an la lut tam a, team angin an khel tawk lo. Tun ṭumah an khelh dan tur a dang dawn a, a hmuhnawm ngei rin a ni. Lalrinzuala, Vanlalmuana, Nelson Lalrohlua, Lana, Gospel Lalthawmmawia leh Eddie Zaithanmawia te inthlawp tur chu a entlak khawp ang.

Zarkawt BCA assistant coach Lalruatfela'n an inkhelh hmasak zawk ṭumin chak lo mah se lawmna tur an ngah thu a sawi. Tun ṭumah erawh a ngaihdan a thlak tawh, Afela chuan, "Chak loh chuan kan lawm dawn lo. Khatla hi team ṭha an ni a, kan hneh theih chuan anni nen hian final kan khel thei ang. Kan chak loh erawh chuan final lut turin kan ṭan viau a la ngai dawn. Chuvangin kan chak ngei ngei a ngai," tiin inkhel pawimawhna a sawi.

Dawrpui tlangval Afela chuan, "Match hmasa zawka kan chak lohna chhan bulpui ber chu Mapuia chet ṭhat vang a ni lo a, rebound kan lak theih loh vang a ni. Kan training-naah pawh rebound kan ngai pawimawh a danglam tawh ngei ka beisei. Mapuia hi player ṭha bik a ni a, a chet ṭhat hi chu kan ring hrim hrim mah se a khel tam lo. A hmaa min barakhaihtu chu Gospel-a leh Eddie-a te che ṭha kha a ni," a ti.

BCA hian an player pawimawh Albert Lalramchhuana leh HT Vanlalremruata te an chhawr thei dawn lo a, player dang an dam ṭha. Zarkawt bakah Leitan, Dinthar, Armed Veng leh Ramthar aṭangin BCA hian ṭawiawmna an hmu ṭha. An khingpui tur TBL nen hian player leh mipuiah an inel tawk a, basketball ngainatu tan hmaih thiang lo a ni.