League Cup: Premier League club an chak

English football-a club-te inelna ngaihven hlawh League Cup second round chu khelh zawh a ni ta a, Premier League club inlan tam zawkin hnehna an chang.

League Cup hi first round aṭanga khelh ṭan niin, first round-ah hian League One (24) leh Two (24) bakah Championship club 22-ten inelna an hmachhawn a, heta chak club 35-te chuan second round an lut ṭhin.

Second round-ah hian Championship club pahnih leh Premier League club 13, European football khel lote chu awm sa an ni a, first round-a chakte nen inhmachhawnin third round khel tur an zawng leh ṭhin.

Nilaini zan khan second round hi khelh zawh niin, Premier League club 13 zinga 10-in hnehna an chang a, pathum erawhin an paltlang zo ve ta lo - third round-ah hian European football-a inlan Premier League club pasarihten an lo hmuak ve leh dawn a ni.

Tonali a lo kir

Pawisa inthapna lama a lo inhman avanga thla 10 zet inkhel thei loa hrem lo ni tawh Sandro Tonali chuan a hremna tuar zoin Newcastle United tan a inlan ve leh ta a, Magpies tana a lo kir lehna inkhelah an chak nghal.

Magpies hian anmahni ang thoa Premier League club Nottingham Forest chu khualmualah lenchilhin, 1-1 in an inhnehtawkpui a, penalty-ah 4-3 in an chak zui.

Newcastle tan Joe Willock chuan minute khatna lekah goal hmahruai a khung a, Forest tan Jota Silva chuan minute 50-naah si phurh a sut.

The City Ground-ah goal a luh zui loh avangin penalty pet a ni a, Newcastle tan Joelinton chiahin a hlah laiin, Forest tan Ibrahim Sangare leh Taiwo Awoniyi ten an chhuih goal lo a, inelna pakhat chu an mangṭha der.

Wolves tan Guedes

Wolverhampton Wanderers-in Premier League aṭanga tla hlim Burnley hneh turin harsatna an tawk lo a, 2-0 a paltlangin third round an lut - Wolves tan Goncalo Guedes chuan goal hnih a khung a, lakchhuah a nihin fan-ten amah zahna lantir nan ding chungin an thlah.

Portuguese forward hian kum 2022 khan Wolves hi Valencia aṭangin a pan a, mahse, beisei a phak lo. Benfica leh Villarreal-ah te loan-a chhuahtir a ni a, tun season-ah lo kirin, League Cup-ah goal hnih a khung.

Wolves lawm erawh a kim lo a, midfielder Boubacar Traore chu hliam vangin lakchhuah a ni. Hetihlai hian Premier League kai thar Ipswich Town-in fur pawh a reh hmain League Cup an mangṭha fel der.

Ipswich hian AFC Wimbledon lakah Ali Al-Hamadi hmangin minute thumna lekah goal khung mah se, League Two club hian Omar Bugiel leh Matty Stevens hmangin an chhanglet a, Ipswich hian Conor Chaplin hmangin si phurh sut leh mah se, penalty-ah 4-2 in Wimbledon hi an chak ta tho a ni.

Goal a sur

Southampton-in Cardiff City lakah goal nga an khung a, Cameron Archer chuan goal hnih khungin, Mateus Fernandes, Samuel Amo-Ameyaw leh James Bree ten goal khat ṭheuh an khung a, Championship club khelmualah an inthlahrung lo.

Mahse, Cardiff hian Rubin Colwill, Ronnie Edwards (OG) leh Alex Robertson te hmangin goal an khung ve tho a, 3-3 a nih lai pawh a awm hman - mahse, Saints hian hun pek belhah Archer leh Bree hmangin an khung leh a, 5-3 in an chak daih.

Premier League-a Liverpool ngam lo hlim Brentford-in 1-0 in Colchester United an hneh a, Keane Lewis-Potter chuan League Two club lakah inkhela goal awmchhun hi a khung.

Premier League club pahnih inkhelah West Ham-in Bournemouth an pet chhuak bawk a, Hammers tan player 'form' Jarrod Bowen chuan goal a khung a, Cherries-in a chhanletna tur an nei lo.

Third round chu

League Cup third round draw neih nghal a ni a, champion lai Liverpool-in West Ham an mikhual dawn - Reds tan third round-a Premier League club hmachhawn nghal hi a châkawm lo ang tih a chiang a, anni ai mahin Hammers an lawm lo ang!

1967-68 hnua a vawi khat nana third round lut, League Two club Barrow-in Chelsea an zin chilh tur pawh, "Ka dil loh zawk malsawmna" an ti ngei ang. Ipswich pet thlatu, League Two club tho Wimbledon chuan Magpies an mikhual dawn thung.

Arsenal-in Emirates Stadium-ah Bolton Wanderers an mikhual ang a, Manchester United khelmualah Barnsley an leng dawn thung. Premier League champion Manchester City-in Championship club Watford an mikhual dawn a, harsa loa an paltlang mai a rinawm.

Tottenham Hotspur tan Coventry City khelmualah chak a harsa lo tura ngaih a ni. Champions League khel tur Aston Villa pawhin Wycombe Wanderers an lenchilh dawn a, chak an beisei ang - League Cup third round hi September 16-23 inkara khelh tur a ni.