Djokovic chak awlsam laiin Rublev tan a hautak

Novak Djokovic chuan nimin zing khan Laslo Djere hnehin US Open third round a lut, amah ang bawka Serbian player hi 6-4, 6-4, 2-0 in a hneh - a match lehpekah chuan seeded 28-na Alexei Popyrin a tum ang.

Arthur Ashe Stadium, New York-ah Djokovic leh Djere te hi a tir lamah an inum tawk viau, mahse hun pawimawh laiah player ṭha zawk nihna a lang a, set thumna khelh laiin Djere hi hliam vangin a inhnukdawk ta a ni.

Mizoram lama nimin zing khan United States lamah chuan zanrei a ni a, zana inkhel ni mah se khaw lum vangin player-ten intih daih an mamawh ṭhin, set khatna an khelh zawh hnu lawkah pawh Djokovic hi vur tlangin a inti dai hial.

US Open champion lai Djokovic chuan, "Set hnih chauh khel mah ila kan inkhelh hun chhung kha darkar hnih a tling a, chuvangin a awlsam lo hle. Ka service a ṭhat tawk loh avangin a hnu lama hnathawh tur a tam phah hle," a ti.

Serbian star Djokovic hian Grand Slam nomawi 24 a nei tawh a, record nei ṭha ber a ni. Tun season kal lai bikah erawh major title lak a la nei lo, a duh tak Paris Olympic gold medal a la tawh a, tun ṭumah hian a champion thei bawk a nih chuan a lunglawm a kim lehzual ang.

Rublev tho chhuak

Grand Slam hi chu a danglam a, set hnih la hmasa zawk pawh an chak vek chuang lo - Andrey Rublev chuan Arthur Rinderknech lakah set hmasa pahnih hloh mah se a tawpah a tho chhuak.

Nilaini zan khan New York khawpui a lum hle a, khaw lum zawng hi 33C a tling. Darkar li leh minute ruk chhung an inkhelh hnuah Rublev hi 4-6, 5-7, 6-1, 6-2, 6-2 in a chak a, khua a lum em avang hian vur an hman bakah fan an inchhem tir bawk.

Russian tlangval Rublev chuan, "Set hnuhnung ber kan khel a, chak theihna tur ka service dawn meuh kha chuan ka puar tawh hle, tui ka in tam lutuk a, chu chuan ka pum a tipuar vek thei hial," a ti.

Khaw lum vangin hrehawm ti viau mah se inkhelh banah Rublev hian amah ṭantute a la hmachhawn peih a, hei hian fak a hlawh hle - a match lehpekah chuan Jiri Lehecka a tum ang, ani pawh hian set hnih a hloh hnuah Mitchell Krueger a hneh.

Zverev a chak

Alexander Zverev pawhin kawng dik a la zawh zel, chetsual theihna tura ngaih zinga mi Alexandre Muller chu 6-4, 7-6 (7-5), 6-1 a hnehin US Open third round a lut, a match dawt lehah Tomas Martin Etcheverry a tum leh ang.

Tennis season kal laiah Zverev hian match 54 hnehna a chang tling ta chiah a, ani aia chak tam an awm lo. Zverev chuan, "Ka rilruah hian zawhna tam tak a lo lut ṭhin a, engtikah nge ranking sang ka nih leh ang tihte ka ngaihtuah ṭhin.

"Mahse, chutiang zawhna te chuan awmzia a nei lo tih ka hrethiam tawh, tunah chuan nuam ti leh engthawl tak maiin tennis match hi ka khel tawp tawh mai a ni," tiin a sawi a, nomawi chawi erawh a tum ruh hle.

Kum 27 mi Zverev hi tun dinhmunah world number 4 a ni a, player ṭha tak ni mah se Grand Slam champion a la nih loh avangin dah san a harsa ṭhin, tun ṭumah hian a vawi khat nan champion ngei pawh a tum.

Inkhel dang

Nilaini zan second round inkhel dangah Frances Tiafoe leh Grigor Dimitrov te pawhin hnehna an chang. New York khaw lum karah tennis hmuhnawm chhawpchhuah zel a ni a, player ṭha an chesual duh vak lo.

Tualchhung tlangval Tiafoe hian ṭantu a ngah ṭhin, tennis ngaina US mipuiten an ṭan rawn hian Alexander Shevchenko chu 6-4, 6-1, 1-0 in a hneh, set thumna an khelh lai hian a khingpui hi hliam vangin a inlan tluan thei lo a ni.

Seeded pakuana Dimitrov pawhin Rinky Hijikata chu 6-1, 6-1, 7-6 (7-4) in a hneh ve bawk. Bulgarian tlangval hian set hmasa pahnih a thunun hneh hle a, set thumnaah world number 62 Hijikata rawn kang ve deuh mah se a tho chhuak zo lo.

Kum 33 mi Dimitrov hian third round-ah chuan Tallon Griekspoor a hmachhawn leh ang, ani hian inkhel dangah Sebastian Baez chu 6-1, 2-0 in a lo hneh ve bawk, a khingpui a inhliam avangin hah lutuk loin a tlang.