I League 3 khel tur Chanmari an chak

LZ Juice MPL11-ah Chanmari FC chuan nimin khan Ramhlun Athletic 3-0 in an hneh a, match riat aṭanga point 22 hmuin pakhatna dinhmun an sawhnghet. Lalsangzuala Hmar hote hian I League 3 an khel dawn a, MPL nen inelna hi a kalkawp dawn avangin tun ṭuma point thum an hlawh chhuak hi a hlu hle.

Chanmari hian an inkhelh hmasak zawk ṭumah Ramhlun hi 6-1 in sawp a, niminah inkhelah pawh Lalrokima Ralte, John Lalrempuia Sailo leh KC Malsawmsanga te goal hmangin chiang takin an chak. Chanmari hian September 4, Nilainiah an elpui Aizawl FC an hmachhawn dawn a, hemi hma zan hian I League 3-ah Coramandal FC an hmachhawn dawn - fixtures a hautak chho dawn hle.

CFC an ṭha hret

Chanmari leh Ramhlun Athletic te an inkhel tawk a, ruahsur hnuaiah chungnung zawk an awm lo. Inkhel hmasa zawka goal hmahruai khungtu Felix Lalruatsanga'n chance ṭha a hlah a, Chanmari midfielder KC Malsawmsanga pawhin goalkeeper C. Vanlalhriata chauh a hmachhawn hnuah a khung thei lo - Ramhlun keeper-in a dang ṭha.

Second half-ah Ramhlunin bul ṭan chhelo mah se goal hmaah Chanmari an vannei ta zawk. Dinglam aṭanga Vanlalremruata vawrh luh chu striker Lalkhawpuimawia'n a tihbuai avangin keeper Hriata'n a man thei lo a, Rokima'n a tauh lut. Minute 60-naa goal luh danah Ramhlun player-te an lawm lo a, Mapuia chu goalkeeper chungah a foul-ah an ngai.

Ramhlunin si phurh sut tumin nawr na mah se goalkeeper Zothanmawia an tibuai pha lo. Minute 81-naah goal mawi bik hmuh a ni a, Chanmari substitute John Sailo-in vei lam kil aṭangin goal kilah tak a hlai lut a, keeper Hriata sang ṭha viau mah se chet ngaihna a hre lo.

Chanmari an ṭha hret a, injury time-ah goalkeeper Hriata tihsual vangin Chanmariin an khung belh a, Mapuia hnathawh ṭhat rah chu Sawmsanga'n chak nemnghehna goal khung nan a hmang. Inkhelh ṭantirh lamah harsatna tawk mah se hun tawp lamah erawh coach Sanga hote nuam sa takin an chak.

Ramhlun Athletic erawh match zawna an chak loh avangin point kua an la hmu chhunzawm zel a, palinaah la awm mah se vawiin lama Sihphir Venghlun emaw SYS FC emaw ten hnehna an chang a nih chuan semifinal khel pha chinah an awm dawn lo. I Day Football semifinal khel thei Ramhlun tan MPL11 semifinal khel leh turin insiamṭhat ran a pawimawh hle.

I League 3 chu

2024-25 I League 3 Group Stage chu September 3, Thawhlehni aṭangin khelh a ni dawn a, khawpui pangaah khelh a ni dawn. Mizo club Chanmari FC-in group C a thleng dawn a, Lalsangzuala Hmar hote hian September 3, Thawhlehni dar 7:00-ah Coramandal FC nen match hmasa ber an khel ang.

Group C-ah hian Chanmari FC leh Coramandal FC bakah HAL Sports Club, RKM Football Academy leh GMSC te an awm. Group khat aṭangin pahnih zelin final round an lut dawn a, mahni muala khel tur Mizo club tan final round luhna kawng a inhawng zau hle.

Group pali dang hi Diamond Harbour FC (Naihati Stadium, Kolkata), Sesa Football Academy (Dempo Academy Ground, Goa), Chanmari FC (Rajiv Gandhi Stadium, Aizawl), Karbi Anglong Morning Star FC (KASA Stadium, Diphu) leh Downtown Heroes FC (TRC Stadium, Srinagar) ten an thleng thung.

India rama football inelna sang ber chu Indian Super League a ni a, chumi dawtah chuan I League awmin I League 2 leh I League 3 ten an dawt leh a, a tawi zawng chuan I League 3 hi Indian football fourth division tihna a ni. I League 3 hi season liam ta aṭang khan khelh ṭan a ni a, league-a sang pathum chu I League 2 khel turin an tling. Inelnaah hian Sporting Goa an champion a, an hnuaia awm Dempo leh Sporting Bengaluru te nen I League 2 khel turin an tling a ni.