Liverpool-in Chiesa la lut dawn

Transfer tawp dawn ruaiah Liverpool-in thawm an nei ve zel a, Juventus winger Federico Chiesa la lut turin Italian club nen hian an inrem - kum 26 mi forward hian medical nei turin Anfield a pan nghal a, he thuziak i chhiar meuh chuan an in la lut fel tawh hial mai thei.

Liverpool-in Chiesa man zata an sen tur zat hi tunlai footballer man ngaihtuahin a tlem a, mak tih a hlawh hle. Merseyside club hian pound maktaduai 10 an pe phawt ang a, Chiesa an lakluh hnua an chet ṭhat dan a zirin, £2.5mtd inpek belh leh tur a ni ang .

Kum 26 mi forward hian, "Chona thar hmachhawn turin ka inpeih tawh a ni," tiin Reds a pan tur chungchang a sawi a, Euro 2020-a Italy an champion ṭum khan an player pawimawh a ni - ram tan hian match 51 inlan tawhin, goal sarih a khung.

Fiorentina aṭanga a professional zinkawng zawh ṭanin, match 153-ah goal 34 khungin, assist vawi 26 a nei a, nomawi chawi erawh a nei lo. October 2020 khan Juventus hi season hnih chhung atan loan-in a zawm phawt a, 2022 khan a nghetin a zawm - Juve hian a manah euro maktaduai 50 chuang an seng.

Mahse, January 2022 khan a khupah hliam neiin a talbuai a, November 2022-ah a inkhel leh thei chauh - Liverpool hian ACL hliam nei tawh a nih avangin an lei tlawm thei deuh niin a lang a, Juve coach thar Thiago Motta ngainat zawng a ni lo bawk.

Chiesa hian season hman zawh takah khan Juventus tan match 37 khelin goal 10 a khung a, assist vawi thum a nei bawk. Hetihlai hian Liverpool hi Valencia goalkeeper Giorgi Mamardashvili la lut turin an inrempui tawh bawk a, Georgia international erawh loan-in Valencia-ah a kir leh phawt ang.

Manager thar Arne Slot hnuaia indinthar mek Reds hian Spain midfielder Martin Zubimendi chu lakluh tumin an lo hel tawh a, mahse, Real Sociedad player hian chhuak loa cham a thlang ta zawk.