United-in Sterling an ngaihven

Manchester United chuan Chelsea aṭanga Raheem Sterling lakluh dan ngaihtuahin Blues thuneitute an dawr a, Liverpool leh Manchester City tan pawha khel tawh forward hi Old Trafford-ah United jersey nen kan hmu lo ang tih a sawi theih loh.

Kum 29 mi forward hi Blues manager thar Enzo Maresca chuan a mamawh loh thu a hrilh a, a cham a nih chuan Chelsea jersey haa a inlan a rinawm lo. United an lo lang vat a, a naupan laia Red Devils ṭantu hi lakluh an duh.

United sporting director Dan Ashworth chuan hma a la mek a, an club hlawkna tur a ngaihtuah tel. Red Devils hian an winger Jadon Sancho chhuahtir an duh ve tho a, ani hi Chelsea management lamin an duh ve thung nia sawi a ni - hei hian inbiak a tiawlsam sawt thei.

Juventus pawhin Sancho hi an duh a, mahse, United lamin a loan zawha a ngheta lei theihna dan ziah tel a, a hlawh zawng zawng Italian club hi tum tir vek an tum a, mahse, Juve lam hian hei em hi chu an huam lo nia sawi a ni.

Liverpool aṭanga hming chhertu Sterling hian Reds tana season li a khelh hnuin kum 2015 khan Manchester City a zawm a, a hming a chher hle. Match 339 khelhsakin goal 131 a khung a, assist vawi 73 a nei - Premier League-ah ringawt pawh vawi li a champion pui.

League nomawi bakah hian FA Cup (1), League Cup (5) leh FA Community Shield (1) te a chawipui a, Champions League final khel mah se, a champion pui ve hman lo. Kum 2022 khan Chelsea hi pound maktaduai 50-in a zawm a, City angin a hlawhtling tawh lo.

London club tan hian match 81 khela goal 19 khungin assist vawi 12 a nei a, nomawi a la chawi lo - tunah chuan chhuak thei dinhmunah a ding mek.