SYS tan point hloh a thiang tawh lo

LZ Juice MPL11-ah SYS FC-in vawiin tlai dar 3:00 hian Aizawl FC an hmachhawn dawn a, Lunglei club hian season tawpa semifinal khelh an tum a nih chuan chak loh a thiang tawh lo. Coach Lalmuankima hote hian match li chhung chak hmel an hmu tawh lo a, match thum chhung an chak loh zawn avangin a sang pali zingah an awm pha tawh lo.

I Day Football laiin coach MK-a hoin SYS FC-in Lungleiah training an nei a, MPL an la thutak hle. Mahse, SYS fixtures a fuh lo a, Chanmari FC leh Aizawl FC an hmachhawn nghal vangin an chak lo ve ve. Phase 2 match hmasa berah SYS-in I League club an hmachhawn lehnghal dawn a, hmabak a hautak dawn hle.

Tun season MPL-ah goal lut tam mah se SYS hian goal nga chiah an la khung thei a, an goal bawh a na tawk lo. Chutihrualin SYS hi player naupang rual an ni a, kum 20 hnuai lam awm khawm an nih avangin MPL pressure sangah an naupanna a lang.

Aizawl FC erawh player ṭha lakkhawm an ni a, goal 23 an khung tawh. Zotlang tlangval Lalbiakdika'n hremna a hmang zo a, vawiinah a inlan thei tawh dawn avangin AFC goal bawh a na sawt ang. Victor Lalbiakmawia hote hian SYS hi C. Lalhriatpuia goal hnih bakah Malsawmtluanga Tlangte goal hmangin an hneh tawh a, SYS hneh nawn leh ngei an tum ang.

I League club hian Covid-19 hnuah nomawi an la chawi lo a, MPL11-ah League champion tan lawmman a awm avangin Aizawl FC hian league round-a pakhatna nih an ngai pawimawh dawn. Victor-a hote hian hneh loh an la tawng lo a, mah se round 14 zawha a chung bera awm tur chuan vawiina draw hi a tawk lo - chak a pawimawh ang.