Chawnpui beiseina siamtu Rindika
MPL coach langsar Lalrindika Hmar a rawn kir dawn a, relegation zone aṭangin Chawnpui FC khai chhuah a tum dawn. LZ Juice MPL11-ah vawiin chhun dar 12:00 hian Chawnpuiin Sihphir Venghlun an hmachhawn ang.
Chawnpui hian phase 1-ah point nga chauh an hmu a, an match hnuhnung berah Sihphir Venghlun 2-0 in an hneh lo. MPL9 champion hi relegate dinhmuna an din avangin season liam taa an coach Rindika tan hmabak a hautak dawn a, vawiinah a hun a inṭan dawn.
Rindika chuan, "Coach ṭhahnem tak an awm a, hun harsa an din laia an biak hmasa ber ka ni a, ka chungah rinna an nghat ngam. Tin, nikumah thawhhona ṭha tak kan nei a, club hluiin min ṭahawh ve chuan hna lamah inhriatthiamna a awm ve nen tlan chhiat chiah ka ngai lo," tiin Chawnpui a zawm chhan Vanglaini a hrilh.
Nimin chhun inkhelah Bethlehemin Police lakah point an hlawhchhuah vangin Chawnpui nen point nga ve ve an hmu a, Rindika hote hi head to head-a ṭhat vang chauhin pasarihnaah an awm. Chutihrualin Chawnpui hian hnehna an chang a nih chuan palina nena an inthlauhna chu point khat chauh a ni tawh dawn a, Rindika hote tan semifinal kawng a la inhawng zau.
Rindika chuan, "Thil thar zirna hman a la awm lo a, a dik lo lai pawh kan ennawn zo hman lo. Player tam tak an chhuak a, player awm sate hi ka la hriatchian loh an tam zawk a ni. Dressing room nen lam theihtawp kan chhuah a ngai a, hmasawnna a awm ngei ka beisei," tiin Vanglaini a hrilh.
Chawnpui leh Sihphir Venghlun intawn hnuhnun ber ṭum khan Rindika hian inkhel entute ṭhutna aṭangin a en a, a enkawl ngei dawn tih a hriat tawh avangin inkhel a chik tawh hle. Vawiin lamah erawh technical area-ah a ṭhu tawh dawn a, a thuneihna a inṭan ang.
Sihphir Venghlun tan pawh inkhel pawimawh a ni a, Chawnpui hi a zawna an hneh a nih chuan a sang pali zingah an tel thei dawn. I Day Football-ah Sihphir Venghlun hi che ṭha lo mah se MPL-ah erawh an che chhe lo. Lalthanpuia, PC Lalruatsanga leh Malsawmtluanga Pautu te an nei a, Chawnpui an hneh nawn dawn a nih chuan player pathum hi an pawimawh ang.