Police-in Bethlehem lakah phuba an la thei lo
LZ Juice MPL11-ah Mizoram Police-in FC Bethlehem lakah phuba lak tumin theihtawp chhuah mah se MPL kai thar tlarhnung an ṭhiat thei lo, goal awm loin an inhnehtawk. Lalbiaksanga Colney hoten an goal humhim mah se table mawngphaha awm FCB laka point khat chauh an hmuh avangin an lawm a kim lo ang.
An siksawi nasa
Police-in Bethlehem lakah chak ngei an tum a, 5-2 a an hneh loh ṭuma bul ṭantute zing aṭangin goalkeeper F. Lalmuanawma leh Malsawmfela ten bul an ṭan nawn lo. Muanawma hian goal nga an chhuahna chhanah mawh a phur a, I Day Football an champion ṭuma goalkeeper R. Malsawmkima'n bul a ṭan. Sawmfela erawh second half-a chhawr turin an dah ṭhaah a ngaih theih.
Police hian bul ṭantu player 11 zinga player pasarih chu civil player an ni a, MPL champion nawn thei tur team chu la ni tho mah se an vanglai a pel ve ṭan tih erawh zep rual a ni lo. Tualchhung football thunun leh tur chuan Police hian inthuam ṭhat an mamawh ang.
Bethlehem lamin Police hnehtute chungah rinna an nghat a, bul ṭantu ngai bawkin bul an ṭan. Chutihrualin an khelh dan erawh an thlak hret a, a hma aiin goal venhim an ngai pawimawh zawk.
FCB tum a hlawhtling
Lalhriatpuia Sailo hoten goal venhim an tum a, first half-ah an tum an tihlawhtling a, Police-in chance ṭha an insiam thei lo. FCB tlarhnunga awm Mesak Lalramdinpuia Ralte leh Daniel Lalliana te an ṭangkai a, mual sira awm Lalduhsaka leh Lalrochama te pawhin an hna an thawk ṭha.
Team angin Bethlehem an che ṭha a, chutihrualin Police-in goal khung theihna hun ṭha an nei tho. First half tawp hma hretin freekick an hmu a, MPL10 best player H. Lalbiakthanga'n crossbar a pet per. Bethlehemin an intawn hmasak ṭumin goal nga khung thei mah se nimin lamah erawh an goal bawh a na tawk lo a, Lalfamkima leh Lalnunzira Sailo te ke a hmui tawh lo.
Sawmfela a vanduai
Police-in second half-ah chak ngei tumin Malsawmfela leh Lalnunsanga (Talea) te an luhtir a, an goal pawh a nat phah hle. BS-a Colney hoten freekick hmangin box pawn chiahah chance ṭha ṭum thum ngawt an nei a, an hmang ṭangkai lo vek.
Substitute Sawmfela'n Bethlehem tlarhnung a chhaih buai nasa a, Ramhlun South striker hi FCB tlarhnungin an dah ṭha thei lo. Sawmfela vanneih ṭum a ni lo a, a goal chance neihte goalkeeper Lhakpa Bhutia-a'n a dansak leh ṭhin. Ṭum khat erawh Sawmfela'n goalkeeper Bhutia dan hman lohin a tauh a, goalline aṭangin Duhsaka'n a tauh chhuak.
Bethlehem an bet mawl tawp lo a, counter attack hmangin chance an nei ve tho. FK-a'n goalkeeper Mana chauh a hmachhawn hnuah goal-ah a chantir thei lo a, FCB-in a zawna Police hneh theihna hun ṭha an bawhpelh. Chutihrualin minute 90 chhung inkhel aṭanga thlir chuan point khatah FCB an lungawi ang. Police erawhin Bethlehem an sawp let thei lo mai ni loin hnehna an chang thei lo a, point khat hmu mah se chak lo ang maiin an ngui thung.