Ramsdale a chhuak dawn

Arsenal goalkeeper Aaron Ramsdale chuan club dang a zawm dawn - England international hian Southampton a zawm dawn a, pound maktaduai 25-in an inrem tawh.

Kum 26 mi Ramsdale man zat hi a tirah chuan pound maktaduai 18 an pe phawt dawn a, a chet ṭhat dan a zir leh a inkhelh tam theih dan a zirin pound maktaduai sarih danga pun belh thei tura tih a ni bawk.

Wolverhampton Wanderers pawhin Ramsdale hi an ngaihven ve reng, mahse an duh aiin sum sen tur a hautak deuh avangin an inhnukdawk - Saints erawhin Gunners lam sum beisei angin an theh chhuak ngam thung.

Ramsdale hian kum 2021 khan Sheffield United aṭangin Arsenal hi a zawm a, khatih laia a man zat chu pound maktaduai 24 a ni - Mikel Arteta kaihhruaina hnuaiah hmun pawimawh a chang ṭhin.

Kum 2022-23 season phei kha chuan Premier League match zawng zawng a khel a, thlak a ni miah lo hial. Mahse, Spanish manager Arteta-a'n a duhkhawp lo deuh a, keeper dang David Raya a la lut.

Raya awm chinah Ramsdale hian inkhelhna hmun a chang mumal lo - Raya awm hnuah Premier League match vawi ruk chauh a khel a, tun season match hnih an khelh tawhah a inlan lo.

Arsenal tana a khelh ṭhat avangin England tan pawh a khel phak hman, mahse club lama a inlan tam loh avangin ram tan pawh rin a hlawh lo - Three Lions tana hian rinrawl nih beisei hman mah se tunah chuan a khel phak leh tawh rih lo a ni.

Inkhelh tam a duh a, hmabak thui tak nei a la nih avangin Ramsdale hian a inkhelh phakna tur hmun a ngaihtuah a ngai a, chona thar a hmachhawn dawn a ni.

Southampton hian Inrinni zanah Brentford an lehchilh dawn - Bees nena an inkhelh tur hi chu Ramsdale tan inlan nan a la hma lutuk deuhin a rinawm.