Set hloh loin Gauff a chak

US Open hmeichhe singles champion lai Coco Gauff chuan nimin zing khan Tatjana Maria chu 6-4, 6-0 in a hneh a, harsatna lian tham tawk loin third round a inhlangkai.

American nula Guaff hi a service a ṭha tawk lo a, tihsual pawh a ngah - double fault pawh ṭum kua ngawt a nei. Mahse, world number 99 Maria tan a la ṭha mah mah tho.

Florida star, kum 22 mi Gauff chuan, "Set hnihnaah khan game ka hloh miah lo, scoreline chauh en chuan a awlsam hmel a ni mai thei, mahse a nihna takah chuan set khatna kha a hautak lo zawk.

"Champion lai nih chuan boruak a danglam a, miten kan lakah beiseina an nei sang ṭhin. Chutihrualin, tennis court ka luh tawh hi chuan, engmah hlauh nei loa inkhelh ka tum ṭhin a, chumi chu ka tihlawhtling," a ti.

Gauff hian a match lehpekah chuan Elina Svitolina a hmachhawn dawn. Seeded 27-na Svitolina hian inkhel dangah Anhelina Kalinina chu 6-1, 6-2 in a hneh, tun hmain Grand Slam semifinal vawi thum a thleng tawh a, khingpui awlsam a ni lem lo ang.

Inkhel dangah Aryna Sabalenka tan pawh hna harsa a la awm rih lo - seeded pahnihna hian darkar khat leh minute khat chhung lekin Lucia Bronzetti chu 6-3, 6-1 a hnehin second round a paltlang ve bawk.

Australian Open champion vawi hnih ni tawh Sabalenka hian a tir aṭangin inkhel a thunun a, kawng engkimah chungnung zawkin world number 76 Bronzetti hi hun remchang a siamsak miah lo tia sawi theih a ni.

Wimbledon champion Barbora Krejcikova erawh a chak lo, grass court inelna lian title neitu hian qualifying kaltlanga invaw tling Elena-Gabriela Ruse chu 6-4, 7-5 a hneh loin a zinkawng a tawp.

Victoria Azarenka erawhin harsa lutuk loin hnehna a chang thung - US Open final vawi thum khel tawh Azarenka hian Clara Burel chu 6-1, 6-4 in a hneh a, set hnihna an khelh laiin a khaw hmuh kawngah buaina tawk deuh mah se a chak tlang thei ta tho.