Juve player thar Teun Koopmeiners

Juventus chuan Teun Koopmeiners an la fel ta - Dutch midfielder hi Atalanta aṭangin pound maktaduai 46.1 sengin an lei chhuak a, season nga daih inremna an ziahpui a ni.

Kum 26 mi Koop-meiners hian season hmasa khan Atalanta chu Europa League final a luh pui a, tun hnai season hnih chhung chu a khel ṭha thei hle, midfielder ni mah se season hnih chhungin goal 33 a khung hman.

Euro 2024-ah pawh khan Netherlands tan player pawimawh tura ngaih a ni a, mahse hliam vangin a inlan thei ta lo, tunah erawh a hliam damin inkhel turin a inpeih leh tawh a ni.

Juve hian season hmasa khan Serie A-ah pathumna dinhmun an luah, champion Inter Milan an phak lohna chu point 23 teh meuh a nih avangin hmasawn an mamawh hle tih a chiang.

Old Lady hi nipui bazarah an che na - Koopmeiners hma hian Aston Villa aṭangin Douglas Luiz an la a, Portuguese club Porto duhlai Francisco Conceicao an la fel tawh bawk.

Manager thar Thiago Motta kaihhruaina hnuaiah team an indinthar mek a, tun season Serie A an match hmasa pahnihah chakin table hmahruaitu an ni - Pathianni zan hian AS Roma an mikhual ang.