Player malah kan innghat lo - Inzaghi

Inter Milan manager Simone Inzaghi chuan an thawhhona ṭha chu an team chakna hnar a ni tih a sawi a, player mala innghat ngawt an nih loh thu a sawi bawk.

Serie A champion Inter hi tun season an match hmasa berah Genoa nen an inhnehtawk, an match hnihnaah erawh Lecce chu si hnih faiin an hneh thung a, match hnih aṭangin point li an nei.

Inzaghi chuan, "Season ṭan hma khan ka sawi tawh a, ka thuah ka la dingnghet reng. Hlawhtlinna chan châkin kan tuihal reng tur a ni a, kan inthlahdah a nih chuan club dangin min rawn lehpel mai ang.

"Keini chu Inter Milan kan ni a, engtik lai pawha hnehna chan duh leh nomawi chawi chaka tuihal reng tur kan ni. Chubakah chuan, player tin an pawimawh vek, mimal ni loin team chu kan innghahna a ni," a ti.

Season hmasa khan Inzaghi hian AC Milan leh Juventus te khumin Inter Milan hi a champion pui a, a phu ang ngeiin Serie A coach of the Year atan thlan a ni, tun season chu nikum aiin Juve nen an inel na dawn niin a lang.

Inter hian zanin dar 12:15 hian Atalanta an mikhual dawn. Gian Piero Gasperini enkawl Atalanta hi attacking football hmuhnawm chhawpchhuak ṭhin an ni a, an intawng tur hi a hmuhnawm ang.