European championship 2016 thlirletna

Coach Fernando Santos, captain Cristiano Ronaldo leh Portugal team-in an ramah Henri Delaunay Trophy an hawn a, president Marcelo Rebelo de Sousa chuan, "Huaisenna, tum-ruhna, chak duhna thinlung leh inngaihtlawmna nen hlawhtlinna inchang a ni," tiin chhuang takin an hnam pasalṭhate a fak.

Pathianni khan Stade de France-ah Portugal-in Eder-a goal hmangin inelna thlengtu France chu extra time-ah an hneh a, Euro 2016-ah an champion. Thawhṭanni khan Portugal team thlawhna hi national air force-in an tirh F-16 jet pahnih venna hnuaiah Humberto Delgado Airport, Lis-bon-ah an ṭum a. Captain Cristiano Ronaldo leh coach Fernando Santos te chuan hma rawn hruaiin player dangten an rawn zui a, airport speaker aṭang chuan 'A minha casinha' (France rama inelna an hmachhawn chhunga hnam hla atana an hman) chu tih rik a ni bawk.

Airport aṭang hian bus chung nei lo pahnih hmangin Portugal president chenna Belem Palace an pan a, Portuguese mipui
ṭha-hnem takin an ram pasalṭhate hi an lo hmuak bawk. Portugal president Marcelo Rebelo de Sousa chuan, "Entawn tur ṭha tak inhnutchhiah a ni. Huaisenna, tumruhna, chak duhna thinlung leh inngaihtlawmna nen hlawh-tlinna inchang a ni. In zarah kan vaiin Portugal-ah beisei tur kan nei leh a ni," tiin football hmanga hlawhtlinna chu an ram mipui beiseina chhem nungtu a nih thu a sawi.

Portuguese Football Asso-ciation (FPF) president Fernando Gomes chuan, "Hun danglam hi kan tawn theih kan ring a, kan team hian a vawi khat nan European title an lak theih hi kan beisei a ni. Hun hlimawm tak a ni a, Portuguese mipui zawng zawng chungah min
ṭawi-awmna avangin lawmthu kan sawi a, inelna kan hmachhawn chhungin Portugal aṭanga France rama pemtate chungah kan lawm bawk," tiin a sawi.

Portugal-ah hian footballer ngaihsan rawn an nei a, a hming chu Eusébio da Silva Ferreira a ni. Striker ropui Eusebio kaihhruaina hnuaiah Portugal hian 1966 World Cup-ah pathumna an ni a, amaherawhchu Black Panther hming lem an vuahsak Eusebio hi kum 71-a upa niin January 5, 2014 khan a thi a, an ramin hlawhtlinna an chan lai hi a hmu hman lo.

Portugal team chuan an legend Eusebio zahna lantir nan Portuguese Football Association headquarters hlui an tlawh kual a, player-te chuan, "Eusebio, kan lal i ni," tiin an au rual. Coach Fernando Santos chuan, "Engmah thup tur a awm lo a, zep tur a awm lo. Tuna hlawhtlinna hi Portuguese mipui tan a ni. Portugal chu fakin awm se, ka bula ding ram pasalṭhate hi fakin awm rawh se," tiin mipui ṭhahnem tak hmaah thu a sawi.

Team captain Ronaldo chuan, "Player, coach leh coa-ching staff zawng zawngin he hlawhtlinna hi kan phu a ni. Kan ram chanchinah sulhnu hlu tak kan hnutchhiah a, inelna liana Portugal champion pui hmasa bertu kan ni. Portugal-a cheng zawng zawng hian hlawhtlinna chan hi kan phu a ni," tiin an nomawi chu ram pumpui ta a nih thu a sawi.

Chakna goal khungtu Eder chuan, "He hun min thlentir avangin ka lawm e. Khelmual chhungah khan kan hnungah in ṭang tlat tih kan hriat avangin in tan hian kan theihna zawng zawng kan chhuah a ni. Tun hi kan hlawhtlinna chan avanga lawm hun chu a ni," tiin a sawi ve bawk.