Euro 2016 hlimthla
Beisei pha lo England : Premier League ropui vangin result ṭha nei ngai lo England hun a inherchhuak ve tawh tura ngaitu an kiam tak tak thei lo a, amaherawhchu inelna lianah England-in beisei an pha chuang lo. Mualpho taka Iceland hneh loin Euro 2016 last 16 aṭangin an tla.
Hnam huaisen Iceland : Mipui 323,002 lek chenna nichungin Iceland-in Euro vawi khat an khelhnaah quarterfinal an lut a, match zawng zawnga goal khung thei vek awmchhun an ni. Iceland hian England an pet thla a, khelmual chhunga player-te khawsak dan aṭanga stadium chhung leh pawn lama anmahni ṭantute chetdan chu football chanchin hlutna belhchhahtu a ni ang.
Italy hmaah Spain an chuai : European Championship-ah a zawnin Spain vawi hnih an champion a, vawi thumnaah erawh Italy hmaah an thamral. Inelna ṭan hmaa rinkai zinga tel pha lo Azzurri-in coach Antonio Conte hnuaiah khawvel barakhaihin quarterfinal an thleng pha hial a, penalty hmanga Germany hneh lo Italy tan Euro 2016 an khelh danah zahna tur a awm lo.
Germany an hlawhchham :
France-in 1998 World Cup an champion hnuah Euro 2000-ah an champion a, Spain-in inelna lianah a zawnin vawi thum nomawi an chawi bawk. 2014 World Cup champion Germany erawh semifinal bak an thleng zo lo a, captain Bastian Schweinsteiger penalty chawi dan bakah quarterfinal-a Jerome Boateng-a handball te chu an tum ram an thlen loh chhanah a ngaih theih.
Chenna ngai lo ramah Wales : Khawvel player manto ber Gareth Bale a telna Wales-in European Championship-a vawi khat inlannaah semifinal an thleng a, anmahni aia lian zawka inngai England in a sang pali an thlen ṭum chu kum 20 liam tawh khan a ni.
Ronaldo show : Inhliam vangin final-a minute 25-naah Cristiano Ronaldo chu lakchhuah a ni a, Portugal captain hi khelmual chhungah awm tawh lo mah se technical area aṭangin final khelhna hmuna langsar ber a ni zui a, nomawi chawi thlengin Ronaldo hi cameraman te mit fukna a ni.