Goal 108 leh Euro 2016 chhehvel

European Championship 2016-ah team 24 an tel a, match 51 awmin goal 108 a lut. Football hmuhnawmna hi goal aṭanga teh tur a nih chuan chawhruala match khata goal 2.12 luhna inelna hi chhuan tur a ni lo a, amah-erawhchu football hi goal aṭanga chauha teh tur a nih loh avangin inelna hi a hlawhtling thawkhata ngaih a ni.

Goal chu

Iceland-in match tina goal an khung laiin Ukraine-in goal an khung lo a, inelna thlengtu France-in goal 13 khungin anni aia khung tam an awm lo. Les Bleus hian 1984 Euro-ah khan goal 14 an khung a, hei hi inelna vawi khata team pakhatin goal an khung tamna ber a ni.

Cristiano Ronaldo chuan Euro inelna a khelh tawhnaah vawi 122 shot a nei a, kum 1980 hnu lam aṭang chuan Portugal captain hian goal attempt a ngah ber lawr lak a, amah hnaih bertu Thierry Henry (52) pawhin Real Madrid forward goal attempt chanve pawh a pha lo.

Manchester United forward hlui hi Euro (2016, 2012, 2008 leh 2004) palia goal khung thei hmasa ber a ni a, hetihlai hian Germany forward Thomas Muller erawh Euro match 11-ah goal a la khung lo. Bayern Munich forward hian World Cup-ah erawh match 13-ah goal 10 a khung thei lawi si.

Goal lut 108 aṭanga 47 chu ke dinglama khung niin ke vei lam hmangin goal 37 pet luh a ni a, lu hmangin goal 24 tauh luh a ni. Goal lut zinga pariat hi penalty aṭanga khung a ni a, direct freekick aṭangin goal li lut bawkin open play aṭanga lut chu goal 96 a ni. Tun inelnaa goal 100-na hi goal ruk khunga golden boot dawng zui ta France forward Antoine Griezmann khung a ni.

An hlut e

England leh Iceland inkhelh ṭum khan Icelandic TV channel-a Euro pek lohna channel en chu mi 298 chiah an ni. Iceland rama TV entu 99.8% in England an hneh lai hi an en a ni. Euro 2016 kha ram 230-ah pekchhuah a ni a, inkhel apianga live-a inkhel entu zat chu chawhrualin mipui mak-taduai 130 anga chhut a ni.

Sum lamah pawh inelna buatsaihtuten hlawkna an tel nual. Euro 2016 aṭanga an sum hmuh zat chu euro tluklehdingawn 1.93 a ni a, an sum sen euro tluklehdingawn 1.1 paih hnua an hlawkna chu euro maktaduai 830 a ni. UEFA-in a chhut danin football inelna lian avang hian mi 25,000-in hna nghet an neih phah a, stadium thar sak leh chei ṭhat vangin hna 20,000 awm belhin Euro 2016 lai khan mi 100,000 zetin thawh tur an neih phah bawk.