Shandong Luneng-ah Graziano Pelle a lut China-in khawthlang football-a run zel

Chinese Football Association chuan kumin March thla khan kum 2025-ah chuan 'world football superpower' ni thei tawh tura ruahmana an siam thu an puang a - an ruahmanna hi tih hlawhtlin ngei an tum tih transfer bazar-ah Chinese club-ten an lantir zel.

January transfer bazar-a Chinese Super League club-ten player lakluh nana sum an sen zat chu pound maktaduai 200 chuang a ni a, nipui bazar-a in-hawng a, an la duhtawk lo cheu!

Shanghai SIPG chuan Asian football chanchina player manto ber ni turin Zenit St Petersburg forward Hulk chu pound maktaduai 46.1-in an lalut a, Newcastle United striker Papiss Cisse-a'n Brazilian striker hnung hi zui ve nghalin Shandong Luneng a zawm a, tunah chuan Chelsea nena sawi zawm hlawh Graziano Pelle-a'n China a pan ve leh ta.

Chinese Super League club Shandong Luneng chuan Southampton aṭanga Italian striker lakluh nan hian pound maktaduai 12 vel an seng nia tarlan a ni a, kum khata a hlawh tur zat chu pound maktaduai 13.6 a ni - hei hi Zlatan Ibrahimovic-a'n Manchester United-a a hlawh tur zat nen a inang!

Hmingṭhatna aiah sum

Chelsea-in coach thar Anto-nio Conte an nei a, Italy coach hlui hian ram tana a player rinrawl Graziano Pelle chu Stamford Bridge-ah hruai a duh nia sawi a ni.

Mahse, China aṭangin sum tam tak nen Shandong Luneng an lo lang a, Italy international striker hian Conte-a hnuaia hmingṭhatna aiin khawchhak lama sum tam tak a thlang zawk a, Bundesliga-a Bayern Munich leh Wolfsburg champion pui tawhtu Felix Magath-a hnuaiah a khel dawn.

Everton pawhin lakluh an tum nia sawi Pelle hi dem ngawt theih a ni lo - kum 30-a upa a ni tawh a, a football hun tawp lam a hmang tawh a, sum tamna lam a thlang hi thil mak a ni lo.

Saints-a kum khat bak cham tura contract nei tawh lo striker hi China club-a a contract rei zawng tur tarlan ni lo mah se khawthlang media-te chuan kum hnih leh a chanve chhung atan a ziak niin an tarlang.

Sum ngah ngah hmelṭha

Khawvela player hlawh hnem ber chu Cristiano Ronal-do-a ni a, kum khata a hlawh zat chu pound maktaduai 18 a ni. Ronaldo hnaih bertu Lionel Messi-a'n kum khatah pound maktaduai 17 a hlawh.

Graziano Pelle-a'n kum khat-ah pound maktaduai 13.6 a hlawh dawn a, a hlawh zat ang tho hlawhtu Zlatan Ibrahimovic nen an thiamna leh theihna khaikhin la - Italian striker tan China ram lam pan hi sum lama world class player-te tluk phakna a ni.

Khawvela player hlawh hnem ber pahnihna Messi leh Hulk-a hlawh zat a inang a, player pahnih hi a thiamna ang zawng chuan khaikhin chi pawh an ni lo - mahse, China-in sum an ngah miau a, Shanghai SIPG striker hian hlawh tam lamah Ronaldo chiah a chung en.

Tu nge Pelle?

Pelle-a hlawh tur zat a tam a, he striker hi eng anga thiam nge a nih chiah le? tih chu football ngainatute thinlunga zawhna lo awm thei nghal chu a ni.

Euro 2016 khelh zawh taka goal hnih khungtu striker hian a hunlaia Serie A club Lecce-ah a career a ṭan a, a hming chher ṭanna tak tak erawh Feyenoord-ah a ni.

Italian club Parma aṭangin Dutch club hi kum 2012 khan loan-in a zawm a, a season hmasa berah inelna hrang hranga match 33 inlan chungin goal 29 a khung a, a hming a chher hle.

Season chawhma lama a chet ṭhat nghal avangin Pelle hian January 2013 a thlen meuh chuan kum li daih contract a ziak a, a season hnihnaah pawh Dutch club tan inelna hrang hrangah match 33 inlanin goal 26 a khung.

Kum 2014-ah Southampton-in pound maktaduai 8-in Italian striker hi an lalut a, Saints tan season hnih chhunga match 81 khelin goal 30 a khung - Italy tan vawi 17 inlan ve tawhin goal sarih a khung tawh bawk.

China-ah tute nge khel?

Newcastle United striker Pa-piss Cisse, Graziano Pelle, Zenit St Petersburg forward Hulk-ten nipui transfer-ah China an pan a, anni hma hian January transfer khan player langsar tak takin China an lo pan tawh.

Pound maktaduai 38.4 man Alex Teixeira chuan Jiangsu Suning tan a khel mek a, he club-ah vek hian pound maktaduai 25 man Chelsea midfielder hlui Ramires chu a khel bawk.

Inter Milan aṭanga Shang-hai Shenhua pantu Fredy Gua-rin, Paris St-Germain aṭanga Hebei China Fortune pantu Ezequiel Lavezzi leh a khelhpui Roma winger hlui Gervinho, Sunderland tana khel ṭhin Shanghai SIPG striker Asamoah Gyan, Shanghai Shenhua striker Demba Ba, Guangzhou Evergrande midfielder Paulinho-te chu khawvel huap player langsar zinga Chinese Super League khel mekte an ni bawk.