McEnroe nena thawhdun zel duhtu Raonic

Wimbledon 2016 final-ah Britain number 1 Andy Murray hneh lo mah se Milos Raonic chuan John McEnroe nena thawhdun zel a duh thu a sawi chhuak.

Grand Slam vawi sarih champion tawh McEnroe hi kumin May thla aṭang khan Raonic-a coaching team zingah a tel ve chauh a, coach Riccardo Piatti te nena an thawhhona hnuaiah Canadian tlangval hian hmuh theih khawpin hma a sawn - Queen's leh Wim--bledon-ah te final a lut a, mah se world number 2 Murray lakah a chak lo thung.

Kum 2013 aṭanga Raonic nena lo thawkdun tawh coach Piatti chuan, "John hian tawnhriat a nei ṭha em em a, tennis game a ngainat bakah a hmangaih. Kan team a awm zel duh se kan ti hle a, hei hi kan zavaia duhthusam pawh a ni," a ti.

A vawi khat Grand Slam final khelh naah chak zo lo mah se Raonic chuan McEnroe aṭanga zirlai tamtak a zir chhuah hman thu a sawi a, "Kan hnena a cham chhunzawm duh ngei pawh ka ring a, a kaihhruaina hnuaiah kan tum ram pawh kan thlen theih ngei ka beisei," tiin Wimbledon champion vawi thum ni thei kaihhruaina hnuaiah beisei a neih san thu a sawi ve bawk.