West Ham-ah Tore a kal

Premier League club West Ham United chuan Besiktas winger Gokhan Tore chu season khat chhung atan loan-in an hawh dawn a, a ngheta an lakluh zui theihna turin inremna an siam bawk.

Germany rama piang, Turkey tana khel forward hi Chelsea academy aṭanga inzir chhuak a ni a, tun hmain Hammers boss Slaven Bilic hian Besiktas-ah a lo enkawl tawh ṭhin bawk.

Season hmasa khan Besiktas tan match 24 a khelh aṭangin goal li a khung bakah a ṭhiante goal khung tur vawi ruk a siamsak bawk a, Turkish Super Lig champion an nih theih nana player pawimawh leh ṭangkai a ni.

Kum 24-a upa Tore chuan Bilic chu Premier League a pan chhan a nih thu sawiin, "Ani hi manager ka hrawn tawh zinga la ṭha ber a ni. Min hrechiang em em a, min sawm a nih chuan ka tan hnar a theih loh," tiin Hammers manager chu a dah sang hle.

West Ham hi season thar atana inbuat-saihna neiin United States lamah an awm mek a, kar hmasa khan Seattle Sounders chu 3-0 a hnehin North Ameri-can Soccer League team Carolina RailHawks an hmachhawn leh bawk ang.