NBA star Duncan a chawl ta

San Antonio Spurs star power forward Tim Duncan chuan season 19 chhung zet National Basketball Association championship a chenchih hnuah Thawhṭanni khan basketball a chawlhsan thu a puang.

Kum 40-a upa Duncan hian 1997 khan San Antonio Spurs-ah a senior career bul a ṭan a, a hun tawp thlengin club dangah chhuak loin a hmangaih hmasa tan a rinawm tluan - season 19 a khelh chhung hian a team hi playoff a hruai thleng ziah.

NBA Finals MVP atana vawi thum thlan tawh Duncan leh a khelhpui Tony Parker leh Manu Ginobili te hi NBA chanchina player inkawp fuh berte zinga mi an ni a, an khelh ho lai hian regular season-ah match 575 hnehna changin playoff-ah
ṭum 126 zet a chak zawkah an ṭang bawk.

Spurs chuan Twitter lamah, "Season 19, vawi nga champion, team pakhat. Tim Duncan kan lawm e," tiin an player ropui an thlah.

A inkhelh hunchhung hian chawh rualin match tinah point 19 score ziah leh assist ṭum 10.8 nei ziah anga chhut a ni a, season hmasa khan a khup hliam vangin match 61 chauh a khel thung.

MVP atana ṭum hnih an thlan tawh Duncan hian Spurs hi NBA champion vawi nga (1999, 2003, 2005, 2007, 2014) a nihpui a, All Star team-ah ṭum 15 ngawt telin an club chanchina hming reh tawh ngailo turte zinga mi a ni.